విశాఖపట్నం, సూర్య న్యూస్ : 1990ల కాలంలో తన బుర్రకథ ప్రదర్శనలు, జానపద పాటలతో యావత్ ఉమ్మడి ఆంధ్రప్రదేశ్‌ను ఉర్రూతలూగించిన సుప్రసిద్ధ కళాకారిణి గరివిడి లక్ష్మి (Garividi Lakshmi) జీవిత కథ ఇప్పుడు వెండితెరపైకి రాబోతోంది. ఉత్తరాంధ్ర జానపద కళకు వన్నెతెచ్చిన ఆమె బయోపిక్ ఈ నెల 17న ప్రేక్షకుల ముందుకు రానున్న నేపథ్యంలో, ఆమె రియల్ లైఫ్ నేపథ్యంపై సర్వత్రా ఆసక్తి నెలకొంది.
ఎవరీ గరివిడి లక్ష్మి?
విజయనగరం జిల్లా గరివిడి మండలం గెడ్డపువలస గ్రామానికి చెందిన రెడ్డి విజయలక్ష్మిని ప్రజలు అభిమానంగా ‘గరివిడి లక్ష్మి’, ‘పెద్ద లక్ష్మి’ అని పిలుచుకునేవారు. పురుషుల ఆధిపత్యం ఎక్కువగా ఉండే బుర్రకథ కళారంగంలోకి 1994లో ప్రవేశించిన ఆమె.. ఒక మహిళగా తనదైన శైలిలో హాస్యం, మాస్ టచ్, సామాజిక అంశాలను జోడించి అశేష ప్రేక్షకాదరణ పొందారు. 1996 నాటికే స్టార్ స్టేటస్ సాధించిన ఆమె, సుమారు 15 ఏళ్ల వ్యవధిలో 10 వేలకు పైగా ప్రదర్శనలు ఇచ్చి అరుదైన రికార్డు సృష్టించారు.
ప్రతి ఇంటా ఆమె క్యాసెట్లే
ఆ రోజుల్లో గరివిడి లక్ష్మి ప్రదర్శన లేకుండా ఉత్తరాంధ్రలో ఏ ఊరిలోనూ ఏ కార్యక్రమం జరిగేది కాదంటే ఆమెకున్న క్రేజ్ అర్థం చేసుకోవచ్చు. ఆమె స్వయంగా సృష్టించి పాడిన ‘మందులోడా.. ఓరి మాయలోడా’, ‘మాలవారి మంగమ్మ’, ‘కోసింది కోయగూర’ వంటి జానపద పాటలు నేటికీ జనం నోళ్లలో నానుతూనే ఉన్నాయి. శ్రీమాతా రికార్డింగ్ కంపెనీ ద్వారా విడుదలైన ఆమె ‘నవ్వుల బండి’ లాంటి ఆడియో క్యాసెట్లకు అప్పట్లో విపరీతమైన డిమాండ్ ఉండేది. గరివిడి లక్ష్మి పాటల క్యాసెట్ లేని ఇల్లు ఉండేది కాదని స్థానికులు నేటికీ గుర్తుచేసుకుంటారు.
వెండితెరపై జీవిత కథ
కెరీర్‌లో అత్యున్నత శిఖరాలను అధిరోహించిన గరివిడి లక్ష్మి ఆ తర్వాత క్రమంగా పబ్లిక్ లైఫ్‌కు దూరమయ్యారు. ప్రస్తుతం ఆమె తన స్వగ్రామంలో ప్రశాంతమైన జీవితం గడుపుతున్నారు. ఇటీవల బీబీసీతో మాట్లాడిన ఆమె, సినిమా విడుదలయ్యాక తన జీవితం గురించి మరిన్ని విషయాలు పంచుకుంటానని తెలిపారు. ఇప్పుడు ఆమె జీవిత కథ ఆధారంగా తెరకెక్కుతున్న ‘గరివిడి లక్ష్మి’ సినిమాలో ప్రముఖ నటి ఆనంది ప్రధాన పాత్రను పోషిస్తున్నారు. ఒక మహిళా కళాకారిణి ఎదుగుదల, అకస్మాత్తుగా ఆమె తెరమరుగవడానికి దారితీసిన పరిస్థితులను ఈ సినిమాలో ఆవిష్కరించనున్నారు.
ఈ వార్తపై మీ స్పందన?
🔥 గత 24 గంటల్లో అత్యధికంగా చదివిన వార్తలు
ఇవి గత 24 గంటల్లో ఎక్కువ మంది చదివిన వార్తలు
