BR Ambedkar Open University : రిజర్వేషన్లపై సంచలన సదస్సు.. ఓపెన్ యూనివర్సిటీ వేదికగా కీలక చర్చ

హైదరాబాద్, సూర్య న్యూస్: సమాజంలో ప్రజాస్వామ్య మూలాలు మరింత బలోపేతం కావాలంటే రిజర్వేషన్లు (Reservations) అనేవి కేవలం చట్టపరమైన హక్కులు మాత్రమే కాదని అవి సామాజిక సాధికారతకు ఆయుధాలని ప్రముఖ విద్యావేత్తలు అభిప్రాయపడ్డారు. హైదరాబాద్ లోని డాక్టర్ బి.ఆర్. అంబేద్కర్ సార్వత్రిక విశ్వవిద్యాలయం (Dr. B. R. Ambedkar Open University) వేదికగా సోషల్ ఎంపవర్‌మెంట్ వీక్ (Social Empowerment Week) వేడుకలు బుధవారం ఘనంగా జరిగాయి. ఇందులో భాగంగా అకడమిక్ భవనంలోని ప్రొఫెసర్ కేథు విశ్వనాథ రెడ్డి హాల్ లో రిజర్వేషన్స్ – డెమోక్రసీ – ఛాలెంజెస్ (Reservations – Democracy – Challenges) అనే అంశంపై ప్రత్యేక సదస్సు నిర్వహించారు. ఈ కార్యక్రమానికి విశ్వవిద్యాలయ ఉపకులపతి (VC) ప్రొఫెసర్ ఘంటా చక్రపాణి ముఖ్య అతిథిగా హాజరై ప్రసంగించారు.

సమాజంలో నెలకొన్న అసమానతలను తొలగించి సమానత్వాన్ని సాధించడంలో రిజర్వేషన్ల పాత్ర అత్యంత కీలకమని ఘంటా చక్రపాణి పేర్కొన్నారు. ప్రజాస్వామ్య వ్యవస్థలో ఎదురవుతున్న సవాళ్లను అధిగమిస్తూ రిజర్వేషన్ల ఫలాలు అర్హులైన అందరికీ అందాలని ఆయన ఆకాంక్షించారు. ఈ సదస్సులో ప్యానెల్ సభ్యులుగా పాల్గొన్న ప్రొఫెసర్ ఎస్. మల్లేశ్, ప్రొఫెసర్ చన్నా బసవయ్య, డాక్టర్ ఎన్. కిషోర్ రెడ్డి, శ్రీ జులూరు గౌరి శంకర్ తమ విశ్లేషణలతో ఆకట్టుకున్నారు. విద్య మరియు సామాజిక అవగాహన ద్వారానే అణగారిన వర్గాల్లో చైతన్యం వస్తుందని వారు వివరించారు. ఈ కార్యక్రమంలో పెద్ద సంఖ్యలో విద్యార్థులు, అధ్యాపకులు మరియు మేధావులు పాల్గొని సదస్సును విజయవంతం చేశారు.