Elections: ఏపీ మున్సిపల్ సీట్ల సర్దుబాటు ఖరారు.. బీజేపీకి రెండు, మరి జనసేన పరిస్థితేంటి?

అమరావతి, సూర్య న్యూస్ : ఆంధ్రప్రదేశ్ స్థానిక సంస్థల ఎన్నికల (AP Municipal Elections) పోరులో అధికార కూటమి పార్టీల మధ్య సీట్ల సర్దుబాటు ప్రక్రియ దాదాపు కొలిక్కి వచ్చింది. సుదీర్ఘ చర్చల అనంతరం రాష్ట్రంలోని నగరపాలక సంస్థల పంపకాలపై టీడీపీ, జనసేన, బీజేపీ (TDP Janasena BJP) పక్షాల మధ్య ఏకాభిప్రాయం కుదిరింది. మేయర్ పీఠాల కేటాయింపులో మిత్రపక్షాలకు ముఖ్యమంత్రి చంద్రబాబు నాయుడు సముచిత స్థానం కల్పించినట్లు తాజా జాబితా ద్వారా స్పష్టమవుతోంది.

ఎవరికి ఏ స్థానాలంటే..

తాజా ఒప్పందం ప్రకారం రాష్ట్రంలోని కార్పొరేషన్లలో పవన్ కళ్యాణ్ నేతృత్వంలోని జనసేన పార్టీకి కీలకమైన నాలుగు స్థానాలు దక్కాయి. శ్రీకాకుళం, కాకినాడ, ఏలూరు, విజయవాడ నగరపాలక సంస్థల్లో జనసేన అభ్యర్థులు బరిలోకి దిగనున్నారు. ఇక జాతీయ పార్టీ బీజేపీకి అనంతపురం, రాజమహేంద్రవరం స్థానాలను కేటాయించారు. మిగిలిన 11 నగరపాలక సంస్థలైన ఒంగోలు, నెల్లూరు, కడప, కర్నూలు, తిరుపతి, చిత్తూరు, విజయనగరం, విశాఖపట్నం, మచిలీపట్నం, మంగళగిరి-తాడేపల్లి, గుంటూరు స్థానాల్లో ప్రధాన పార్టీ టీడీపీ పోటీ చేయనుంది.

పంతం వీడారా.. పట్టు సాధించారా?

ఈ సీట్ల సర్దుబాటు కూటమిలో ఎవరికి లాభం చేకూర్చింది, ఎవరెంత మేర రాజీ పడ్డారు అనేదానిపై రాజకీయ వర్గాల్లో ఆసక్తికర చర్చ జరుగుతోంది. మున్సిపల్ ఎన్నికల్లో తమ సత్తా చాటాలని పట్టుదలతో ఉన్న జనసేన.. సీట్ల విషయంలో తగ్గేదే లేదన్నట్లుగా ముందునుంచీ వ్యవహరించింది. అయితే తాజా కేటాయింపులు చూస్తే జనసేన ఎక్కడా పంతం వీడలేదని, పైగా పట్టుబట్టి మరీ కీలక స్థానాలను సాధించుకుందని విశ్లేషకులు భావిస్తున్నారు. ముఖ్యంగా రాష్ట్ర రాజకీయాలకు కేంద్ర బిందువైన ‘విజయవాడ’ కార్పొరేషన్‌తో పాటు, ఉభయ గోదావరి జిల్లాల్లో బలమైన కాకినాడ, ఏలూరు స్థానాలు దక్కించుకోవడం జనసేనకు అతిపెద్ద విజయంగా చెప్పవచ్చు.

బీజేపీ బేరసారాలు.. టీడీపీ వ్యూహం

ఇక జాతీయ నాయకత్వం అండతో బేరసారాలు చేసిన రాష్ట్ర బీజేపీ కూడా తాను కోరుకున్నవి సాధించినట్లుగానే కనిపిస్తోంది. బీజేపీ రాష్ట్ర అధ్యక్షురాలు పురందేశ్వరి ప్రాతినిధ్యం వహిస్తున్న రాజమహేంద్రవరం ఎంపీ స్థానం పరిధిలోని కార్పొరేషన్‌ను ఆ పార్టీ కైవసం చేసుకుంది. అలాగే రాయలసీమలో పట్టు పెంచుకునే దిశగా అనంతపురం స్థానాన్ని దక్కించుకుంది. మిత్రపక్షాలను ఏమాత్రం అసంతృప్తికి గురిచేయకుండా, బీజేపీ అధిష్ఠానం చేసిన సూచనలకు సానుకూలంగా స్పందిస్తూ చంద్రబాబు నాయుడు ఈ సీట్ల సర్దుబాటును వ్యూహాత్మకంగా పూర్తి చేశారు. అసెంబ్లీ ఎన్నికల నాటి “వంద శాతం స్ట్రైక్ రేట్” మ్యాజిక్‌ను స్థానిక సంస్థల్లోనూ పునరావృతం చేసేలా కూటమి నేతలు సమన్వయంతో అడుగులు వేస్తున్నారని, ఈ కేటాయింపులతో కూటమిలో సర్దుబాటు సజావుగా ముగిసినట్లేనని రాజకీయ విశ్లేషకులు అభిప్రాయపడుతున్నారు.

పేజీల కొద్దీ వార్తలు చదివే తీరిక లేదా?

అసలు విషయం ఏంటో 3 లైన్లలో ఫాస్ట్‌గా తెలుసుకోవాలంటే..

ఇప్పుడే మా WhatsApp ఛానల్‌లో జాయిన్ అవ్వండి! 🎯

Join