అమరావతి, సూర్య న్యూస్: మాజీ ఎంపీ విజయసాయిరెడ్డి (Vijay Sai Reddy) వైఎస్సార్సీపీని వీడటంపై ఒక బహిరంగ లేఖ (Open Letter) విడుదల చేశారు. జగన్ మోహన్ రెడ్డికి తాను ఎప్పుడూ నమ్మకద్రోహం చేయలేదని ఆయన ఆ లేఖలో స్పష్టం చేశారు. పార్టీలో సజ్జల రామకృష్ణారెడ్డి వ్యవహారశైలి, కోటరీ రాజకీయాల వల్లే తాను తీవ్ర మనస్తాపానికి గురై బయటకు రావాల్సి వచ్చిందని ఆయన ఆరోపించారు. తనపై సోషల్ మీడియాలో జరుగుతున్న దుష్ప్రచారాన్ని ఆయన తీవ్రంగా ఖండించారు.
నెంబర్ 1 సజ్జల.. నెంబర్ 2 జగన్
పార్టీలో సజ్జల రామకృష్ణారెడ్డి రాజ్యాంగేతర శక్తిగా మారారని విజయసాయిరెడ్డి విమర్శించారు. మంత్రులు, ఎమ్మెల్యేలు కూడా జగన్‌ను కలవకుండా సజ్జల అడ్డుగోడలా నిలబడ్డారని పేర్కొన్నారు. సీనియర్ నాయకులు సైతం సజ్జల కింద పనిచేయాల్సిన దుస్థితి ఏర్పడిందని ఆవేదన వ్యక్తం చేశారు. ప్రస్తుతం వైసీపీలో నెంబర్ వన్ సజ్జల అని, నెంబర్ టూ మాత్రమే జగన్ అని ఆయన ఎద్దేవా చేశారు. సజ్జల ఆదేశాలకు తలవంచి పనిచేయడం తన వల్ల కాదని తేల్చి చెప్పారు.
74 అవమానాలు భరించాను
జగన్ కోసం తాను 15 నెలలు జైలు శిక్ష అనుభవించానని ఆయన గుర్తు చేశారు. నమ్మకద్రోహమే తన రక్తంలో ఉంటే కాంగ్రెస్ ప్రభుత్వంతో చీకటి ఒప్పందం చేసుకుని జైలుకు వెళ్లకుండా తప్పించుకునేవాడినని అన్నారు. 2020 నుంచి పార్టీలో తనకు క్రమంగా అవమానాలు మొదలయ్యాయని తెలిపారు. ఉత్తరాంధ్ర బాధ్యతల నుంచి, కోర్ కమిటీ నుంచి తనను తప్పించారని పేర్కొన్నారు. మొత్తంగా 74 అవమానాలు ఎదుర్కొన్నానని, ఆత్మగౌరవాన్ని చంపుకుని పార్టీలో కొనసాగలేనని స్పష్టం చేశారు.
కొత్త పార్టీ ప్రకటన
తన ఆత్మగౌరవాన్ని కాపాడుకునేందుకే రాజ్యసభ పదవికి, వైసీపీకి రాజీనామా చేసినట్లు విజయసాయిరెడ్డి వెల్లడించారు. తాను కొత్త పార్టీ స్థాపిస్తున్నట్లు ఈ లేఖ ద్వారా అధికారికంగా ప్రకటించారు. వైసీపీలో అసలు నమ్మకద్రోహులు, కోవర్టులు ఎవరో కార్యకర్తలు ఆలోచించుకోవాలని సూచించారు. మరో సందర్భంలో మీడియా ద్వారా మరిన్ని నిజాలు వెల్లడిస్తానని ఆయన కుండబద్ధలు కొట్టారు.
ఈ వార్తపై మీ స్పందన?
🔥 గత 24 గంటల్లో అత్యధికంగా చదివిన వార్తలు
ఇవి గత 24 గంటల్లో ఎక్కువ మంది చదివిన వార్తలు
