విజయవాడ, సూర్య న్యూస్ : ఆంధ్రప్రదేశ్ ప్రభుత్వం ఉత్తర అమెరికా ప్రత్యేక ప్రతినిధిగా నియమించిన ప్రముఖ ఎన్నారై నాయకులు కోమటి జయరాం శనివారం విజయవాడలో జరిగిన ఒక ప్రత్యేక కార్యక్రమంలో బాధ్యతలు స్వీకరించారు. ముఖ్యమంత్రి నారా చంద్రబాబు నాయుడు ఆశయాలకు అనుగుణంగా రాష్ట్ర అభివృద్ధిలో ప్రవాసాంధ్రులను భాగస్వామ్యం చేసే ఉద్దేశంతో ప్రభుత్వం ఈ కీలక నియామకాన్ని చేపట్టింది. ఈ సందర్భంగా ఏర్పాటు చేసిన సత్కార సభలో పలువురు రాజకీయ ప్రముఖులు, ఎన్నారై ప్రతినిధులు ఆయనను ఘనంగా సన్మానించారు.
ముఖ్య అతిథిగా హాజరైన కోమటి జయరాం మాట్లాడుతూ ఏపీ అభివృద్ధిలో ఎన్నారైలు కీలక పాత్ర పోషించాలని పిలుపునిచ్చారు. ప్రవాసాంధ్రుల సమస్యల పరిష్కారంతో పాటు రాష్ట్రానికి పెట్టుబడులు, అత్యాధునిక సాంకేతికతను ఆకర్షించడమే తన ప్రధాన లక్ష్యమని ఆయన పేర్కొన్నారు. చంద్రబాబు నాయుడు గారి పారిశ్రామిక విధానాలు మరియు ఎన్నారై పాలసీల వల్ల రాష్ట్రం పెట్టుబడులకు స్వర్గధామంగా మారుతోందని కొనియాడారు. ఈ కార్యక్రమంలో టీడీపీ ఎన్నారై కోఆర్డినేటర్లు సత్యప్రసాద్, ఉపేందర్ తదితరులు పాల్గొని ఆయనకు శౌలవాలు, పుష్పగుచ్ఛాలతో శుభాకాంక్షలు తెలియజేశారు.
కోమటి జయరాం గతంలో తానా (TANA) అధ్యక్షుడిగా సేవలు అందించి తెలుగు సమాజంలో మంచి గుర్తింపు పొందారు. అమెరికాలో ‘స్వాగత్’ గ్రూప్ ఆఫ్ హోటల్స్ అధినేతగా పారిశ్రామికవేత్తగా రాణిస్తూనే సామాజిక సేవా కార్యక్రమాల్లో చురుగ్గా పాల్గొంటున్నారు. రాష్ట్ర ప్రభుత్వం చేపట్టిన ‘వన్ ఫ్యామిలీ – వన్ ఎంట్రప్రెన్యూర్’ వంటి పథకాల ద్వారా ఎన్నారైలు ఉపాధి కల్పనలో భాగస్వాములు కావాలని ఈ సందర్భంగా చర్చించారు. ప్రభుత్వం కేటాయించిన 50 కోట్ల ఎన్నారై కార్పస్ ఫండ్ ద్వారా ప్రవాసాంధ్రులు రాష్ట్రంలో పరిశ్రమలు స్థాపించేందుకు గొప్ప అవకాశం ఏర్పడిందని వక్తలు అభిప్రాయపడ్డారు. ఈ కార్యక్రమంలో పలువురు ఎమ్మెల్యేలు, టీడీపీ నాయకులు మరియు మహిళా ప్రతినిధులు పాల్గొన్నారు.