
హైదరాబాద్, సూర్య న్యూస్ : సికింద్రాబాద్లోని ఉస్మానియా విశ్వవిద్యాలయ (Osmania University) పీజీ కళాశాల ఆర్థికశాస్త్ర విభాగం ఆధ్వర్యంలో కృత్రిమ మేధస్సు ఆధారిత పరిశోధనపై (Artificial Intelligence) రెండు రోజుల జాతీయ వర్క్షాప్ శుక్రవారం ఘనంగా ప్రారంభమైంది. ఐసీఎస్ఎస్ఆర్ దక్షిణ ప్రాంతీయ కేంద్రం సౌజన్యంతో నవంబర్ 20, 21 తేదీల్లో నిర్వహిస్తున్న ఈ సదస్సును ఐసీఎస్ఎస్ఆర్-ఎస్ఆర్సీ డైరెక్టర్, ఓయూ పరీక్షల నియంత్రణాధికారి ప్రొఫెసర్ బి. సుధాకర్ రెడ్డి ముఖ్య అతిథిగా హాజరై ప్రారంభించారు.
పరిశోధనల్లో నాణ్యతకు పెద్దపీట వేయాలి
ప్రారంభోత్సవ ఉపన్యాసంలో ప్రొఫెసర్ బి. సుధాకర్ రెడ్డి మాట్లాడుతూ విద్యాసంస్థల్లో జరిగే పరిశోధనలు, పీహెచ్డీ సిద్ధాంత గ్రంథాల్లో సంఖ్య కంటే నాణ్యతకే అధిక ప్రాధాన్యత ఇవ్వాలని సూచించారు. సమాజానికి ఉపయోగపడే అర్థవంతమైన పరిశోధనల వైపు పరిశోధక విద్యార్థులు దృష్టి సారించాలని కోరారు. ఐసీఎస్ఎస్ఆర్ ద్వారా అందుబాటులో ఉన్న స్వల్పకాలిక పరిశోధనా ప్రాజెక్టులు, వివిధ విద్యా అవకాశాలను పరిశోధకులు సద్వినియోగం చేసుకోవాలని పిలుపునిచ్చారు.
నైతిక విలువలతో కూడిన ఏఐ వినియోగం అవసరం
అధ్యక్షోపన్యాసం చేసిన కళాశాల ప్రిన్సిపాల్ ప్రొఫెసర్ ఎస్. కవితా దేవి, సామాజిక శాస్త్ర పరిశోధనల్లో కృత్రిమ మేధస్సును అనుసంధానించడం నేటి కాలంలో ఎంతో అవసరమని పేర్కొన్నారు. అయితే సాంకేతికతను వినియోగించే క్రమంలో పరిశోధన సమగ్రత, విద్యాపరమైన నైతిక విలువలు, బాధ్యతాయుతమైన విధానాలను తప్పనిసరిగా పాటించాలని స్పష్టం చేశారు. విద్యార్థులు, పరిశోధకుల సామర్థ్యాలను పెంపొందించేందుకు ఆర్థికశాస్త్ర విభాగం తీసుకున్న ఈ చొరవను ఆమె అభినందించారు.
మానవ మేధస్సుకు సహాయకారిగా సాంకేతికత
ఓయూ ఆర్థికశాస్త్ర విభాగాధిపతి ప్రొఫెసర్ ఎం. రాములు మాట్లాడుతూ పరిమాణాత్మక విశ్లేషణ, మోడలింగ్, బహుళ శాస్త్ర అధ్యయనాల్లో కృత్రిమ మేధస్సు వినియోగం వేగంగా పెరుగుతోందని వివరించారు. అయితే ఏఐ కేవలం ఒక సహాయక సాధనంగా మాత్రమే పనిచేయాలని, పరిశోధన ప్రక్రియలో మానవ మేధస్సు, విమర్శనాత్మక ఆలోచన, డేటా విశ్వసనీయత ఎప్పటికీ కేంద్రబిందువుగా ఉండాలని స్పష్టం చేశారు. వైస్ ప్రిన్సిపాల్, వర్క్షాప్ డైరెక్టర్ ప్రొఫెసర్ ఎ. లక్ష్మి ఈ సదస్సు ప్రధాన ఉద్దేశాలు, సామాజిక శాస్త్ర పరిశోధనలను బలోపేతం చేయడంలో సాంకేతికత ప్రాముఖ్యతను వివరించారు.
కార్యక్రమంలో పాల్గొన్న అధ్యాపకులు, విద్యార్థులు
జ్యోతి ప్రజ్వలన, జాతీయ గీతం, తెలంగాణ రాష్ట్ర గీతాలాపనతో ప్రారంభమైన ఈ సదస్సు చివరలో అతిథులను ఘనంగా సన్మానించారు. వర్క్షాప్ కోఆర్డినేటర్ డాక్టర్ సతీష్ రైకింది పర్యవేక్షణలో జరిగిన ఈ కార్యక్రమంలో విద్యార్థి సమన్వయకర్త జె. సందీప్, అధ్యాపకులు డాక్టర్ సాండ్రా స్తుతి, డాక్టర్ బాల పద్మ, డాక్టర్ బి. వనిత, డాక్టర్ టి. రమేష్ నాయక్, బోధనేతర సిబ్బంది, పరిశోధక విద్యార్థులు పెద్ద సంఖ్యలో పాల్గొన్నారు.
ఈ వార్తపై మీ స్పందన?
🔥 గత 24 గంటల్లో అత్యధికంగా చదివిన వార్తలు
ఇవి గత 24 గంటల్లో ఎక్కువ మంది చదివిన వార్తలు



