చెన్నై, సూర్య న్యూస్: తమిళనాడు (Tamil Nadu) అసెంబ్లీ ఎన్నికల పోలింగ్ ప్రక్రియ బుధవారంతో ముగిసింది. రెండు రాష్ట్రాల అసెంబ్లీ ఎన్నికల సందర్భంగా పలు ప్రముఖ సర్వే సంస్థలు ఎగ్జిట్ పోల్స్ (Exit Polls 2026) ఫలితాలను విడుదల చేశాయి. తమిళనాడులో అధికారం కోసం జరిగిన పోరాటంలో అధికార డీఎంకే (DMK), ప్రతిపక్ష ఏఐఏడీఎంకే (AIADMK) మధ్య తీవ్ర పోటీ ఉన్నట్లు కనిపిస్తున్నా.. సినీ నటుడు విజయ్ (Actor Vijay) నేతృత్వంలోని టీవీకే (TVK) పార్టీ అనూహ్యంగా పుంజుకోవడం రాజకీయాల్లో సంచలనం రేపుతోంది.
పీపుల్స్ ఇన్ సైట్ సర్వే అంచనా :
ఈ సర్వే ప్రకారం తమిళనాడులో మరోసారి అధికార డీఎంకే కూటమి (DMK Alliance) పగ్గాలు చేపట్టే అవకాశం ఉంది. ఈ కూటమి 125 నుండి 145 స్థానాలతో అధికారాన్ని నిలబెట్టుకోనుందని అంచనా వేసింది. ప్రధాన ప్రతిపక్షం ఏఐఏడీఎంకే 65-80 స్థానాలకు పరిమితమయ్యే సూచనలు కనిపిస్తున్నాయి. ఇక తొలిసారి ఎన్నికల బరిలోకి దిగిన విజయ్ టీవీకే పార్టీ 18-24 స్థానాల్లో గెలుపొంది సత్తా చాటుతుందని పీపుల్స్ ఇన్ సైట్ పేర్కొంది.
యాక్సిస్ మై ఇండియా సంచలన ఫలితాలు :
యాక్సిస్ మై ఇండియా (Axis My India) ఎగ్జిట్ పోల్ ఫలితాలు తమిళ రాజకీయాలను షాక్ కు గురిచేస్తున్నాయి. ఈ సంస్థ అంచనా ప్రకారం విజయ్ నేతృత్వంలోని టీవీకే పార్టీకి ఏకంగా 98 నుండి 120 స్థానాలు వచ్చే అవకాశం ఉందని, తద్వారా దళపతి విజయ్ కింగ్ మేకర్ అయ్యే లేదా అధికారాన్ని చేపట్టే దిశగా వెళ్లే ఛాన్స్ ఉందని పేర్కొంది. ఈ సర్వేలో డీఎంకే 92-100 స్థానాలతో రెండో స్థానానికి పరిమితం కావడం గమనార్హం.
ఓట్ షేర్ మరియు ఓటర్ల మొగ్గు :
మొత్తం 234 అసెంబ్లీ స్థానాలకు గాను మేజిక్ ఫిగర్ 118 స్థానాలు. పీపుల్స్ పల్స్ సర్వే ప్రకారం డీఎంకే కూటమికి 38.4 శాతం, ఏఐఏడీఎంకేకు 31.5 శాతం, టీవీకేకు 23.6 శాతం ఓట్లు వచ్చే అవకాశం ఉంది. 18 నుండి 24 ఏళ్ల మధ్య ఉన్న యువ ఓటర్లలో 34.9 శాతం మంది డీఎంకే వైపు మొగ్గు చూపగా, టీవీకేకు 32.3 శాతం మంది మద్దతు ప్రకటించారు. మహిళా ఓటర్లు ప్రభుత్వ పథకాల వల్ల డీఎంకే వైపు నిలిచినట్లు సర్వేలు చెబుతున్నాయి.
కీలక అభ్యర్థుల పరిస్థితి :
ముఖ్యమంత్రి ఎంకే స్టాలిన్ (CM MK Stalin) కొలత్తూరులో, మాజీ సీఎం పళనిస్వామి (Edappadi K Palaniswami) ఎడప్పాడిలో విజయకేతనం ఎగురవేసే దిశగా సాగుతున్నారు. అయితే టీవీకే అధినేత విజయ్ పోటీ చేస్తున్న రెండు స్థానాల్లో పెరంబూర్ నుండి గెలిచే అవకాశం ఉండగా, ఈస్ట్ తిరుచిరాపల్లిలో వెనుకబడినట్లు సమాచారం. డిప్యూటీ సీఎం ఉదయనిధి స్టాలిన్ (Udhayanidhi Stalin) చెపాక్ నుండి టీవీకే అభ్యర్థి నుండి గట్టి పోటీ ఎదుర్కొంటున్నారు.
ఓట్ల చీలికతో నష్టం ఎవరికి? :
ప్రభుత్వ వ్యతిరేక ఓట్లు టీవీకే, ఏఐఏడీఎంకేల మధ్య చీలిపోవడం డీఎంకేకు కలిసొచ్చే అంశమని విశ్లేషకులు భావిస్తున్నారు. ఎస్సీ యువత టీవీకే వైపు ఆకర్షితులవ్వగా, ముస్లిం మరియు మైనారిటీ ఓటర్లు డీఎంకే వైపే మొగ్గు చూపారు. గతంలో ఎంజీఆర్ సృష్టించిన ప్రభావాన్ని విజయ్ పునరావృతం చేస్తారా లేదా అనేది ఫలితాల రోజు తేలనుంది.
ఈ వార్తపై మీ స్పందన?
🔥 గత 24 గంటల్లో అత్యధికంగా చదివిన వార్తలు
ఇవి గత 24 గంటల్లో ఎక్కువ మంది చదివిన వార్తలు
