ప్రగతినగర్, సూర్య న్యూస్ : జీహెచ్ఎంసీ నిజాంపేట్ సర్కిల్ పరిధిలోని ప్రగతినగర్ డివిజన్ ప్రశాంతి హిల్స్ కాలనీలో చేపల మార్కెట్ ఏర్పాటును వ్యతిరేకిస్తూ కాలనీ వాసులు శనివారం పెద్ద ఎత్తున నిరసన చేపట్టారు. నివాస ప్రాంతాలు, దేవాలయాలు మరియు పార్కుల మధ్యలో మార్కెట్ ఏర్పాటు చేయడం వల్ల స్థానికంగా తీవ్ర అసౌకర్యం కలుగుతుందని వారు ఆందోళన వ్యక్తం చేశారు. ఈ విషయం తెలుసుకున్న బీజేపీ జిల్లా అధికార ప్రతినిధి రచ్చ చక్రధర్ సంఘటనా స్థలానికి చేరుకుని కాలనీ ప్రజలకు తన మద్దతు ప్రకటించారు.
ఈ సందర్భంగా రచ్చ చక్రధర్ మాట్లాడుతూ ప్రజల అభిప్రాయాలను పరిగణనలోకి తీసుకోకుండా అధికారులు ఏకపక్షంగా నిర్ణయాలు తీసుకోవడం సరైన పద్ధతి కాదని ఖండించారు. రెసిడెన్షియల్ ప్లాట్లు, దేవాలయాల సమీపంలో చేపల మార్కెట్ ఏర్పాటు చేయడం వల్ల ఆ ప్రాంతంలో పరిశుభ్రత దెబ్బతినడమే కాకుండా ప్రజల ఆరోగ్యానికి ముప్పు వాటిల్లే అవకాశం ఉందని ఆయన ఆందోళన వ్యక్తం చేశారు. కాలనీ ప్రశాంతతను భంగపరిచే ఈ నిర్ణయాన్ని అధికారులు వెంటనే వెనక్కి తీసుకోవాలని ఆయన డిమాండ్ చేశారు.
స్థానిక ప్రజల ఆరోగ్యం మరియు జీవన ప్రమాణాలను దృష్టిలో ఉంచుకుని, చేపల మార్కెట్కు మరేదైనా అనుకూలమైన ప్రాంతాన్ని ఎంపిక చేయాలని ఆయన అధికారులను కోరారు. కాలనీ వాసుల అభిప్రాయాలను గౌరవించని పక్షంలో ఆందోళనను ఉధృతం చేస్తామని ఆయన హెచ్చరించారు. ఈ కార్యక్రమంలో కాలనీ ప్రతినిధులు, పెద్ద సంఖ్యలో స్థానికులు మరియు అధికారులు పాల్గొన్నారు.
