హైదరాబాద్, సూర్య న్యూస్: తెలంగాణ రాజకీయ యవనికపై మరో మహా సంగ్రామానికి తెర లేచింది. గులాబీ గూటి నుంచి బయటకు వచ్చిన మాజీ ఎమ్మెల్సీ కల్వకుంట్ల కవిత (Kavitha) సంచలన నిర్ణయంతో బీఆర్ఎస్ (BRS) పునాదులు కదిలిపోయేలా కనిపిస్తున్నాయి. తన కొత్త పార్టీకి ఏకంగా ‘టీఆర్ఎస్’ (TRS) అనే పేరును ఖరారు చేసే దిశగా ఆమె అడుగులు వేయడం ఇప్పుడు రాష్ట్రవ్యాప్తంగా హాట్ టాపిక్ గా మారింది. తండ్రి వదులుకున్న అస్త్రన్నే ఆయుధంగా చేసుకుని, కేసీఆర్ (KCR) సామ్రాజ్యానికే ఆమె సవాల్ విసురుతున్నారా అన్న చర్చ మొదలైంది.
పాత పేరు.. కొత్త ఎజెండా!
తెలంగాణ అస్తిత్వానికి నిలువుటద్దంలా నిలిచిన ‘తెలంగాణ రాష్ట్ర సమితి’ (TRS) పేరును భారత రాష్ట్ర సమితి (BRS) గా మార్చడం చారిత్రక తప్పిదమని ఇప్పటికే విమర్శలు వెల్లువెత్తుతున్నాయి. సరిగ్గా ఈ పాయింట్నే కవిత తన రాజకీయ ఎదుగుదలకు అనువుగా మార్చుకుంటున్నారు. ఎలక్షన్ కమిషన్ వద్ద ప్రస్తుతం టీఆర్ఎస్ పేరు ఖాళీగా ఉందని, దానిని ఎవరైనా వాడుకోవచ్చని ఆమె చేసిన వ్యాఖ్యలు బీఆర్ఎస్ నాయకత్వంలో వణుకు పుట్టిస్తున్నాయి. ఏప్రిల్ 25న జరగబోయే పార్టీ ఆవిర్భావ సభలో ఈ పేరుపై అధికారిక ప్రకటన వచ్చే అవకాశం ఉంది.
బిహార్ సిద్ధాంతకర్తలకు నో ఎంట్రీ!
బీఆర్ఎస్ వర్కింగ్ ప్రెసిడెంట్ కేటీఆర్ (KTR) అనుసరిస్తున్న కార్పొరేట్ తరహా రాజకీయాలను లక్ష్యంగా చేసుకుంటూ కవిత పదునైన విమర్శలు చేశారు. తమ పార్టీలో ‘బిహార్ సిద్ధాంతకర్తల’ పెత్తనం ఉండదని, కేవలం ఆచార్య జయశంకర్ తెలంగాణ సిద్ధాంతాలే ఉంటాయని స్పష్టం చేశారు. ఇది నేరుగా పార్టీలోని స్ట్రాటజిస్టుల తీరుపై ఆమె చేసిన యుద్ధ ప్రకటనే అని విశ్లేషకులు భావిస్తున్నారు. స్వచ్ఛమైన తెలంగాణ ఉద్యమ ఆకాంక్షలతో కూడిన పార్టీని మళ్లీ ప్రజల ముందుకు తెస్తానని ఆమె ధీమా వ్యక్తం చేస్తున్నారు.
సిద్దిపేట, గజ్వేల్ నుంచే పోటీ?
కేసీఆర్, హరీష్ రావులకు కంచుకోటలుగా ఉన్న నియోజకవర్గాల్లోనే కవిత పాగా వేయాలని చూస్తున్నారు. మహిళా రిజర్వేషన్లు అమలైతే సిద్దిపేట లేదా గజ్వేల్ నుంచి పోటీ చేసేందుకు సిద్ధమని ఆమె సంకేతాలిచ్చారు. “ఆడబిడ్డకు ఓటేయడం అనేది ఒక ఎమోషన్” అంటూ సెంటిమెంట్ అస్త్రాన్ని ప్రయోగించారు. అదృష్టవంతుడిని ఎవరూ ఆపలేరని, ప్రకృతి కూడా తనకు సహకరిస్తోందని వ్యాఖ్యానిస్తూ.. ఢిల్లీ మద్యం కేసు నుంచి విముక్తి పొందిన తర్వాత తన తదుపరి లక్ష్యం రాజకీయ యుద్ధమేనని తేల్చి చెప్పారు.
బీఆర్ఎస్ భవిష్యత్తు ఏంటి?
ఒకవేళ కవిత నిజంగానే టీఆర్ఎస్ పేరును దక్కించుకుంటే, బీఆర్ఎస్ పార్టీ ఉనికికే ప్రమాదం ఏర్పడే అవకాశం ఉంది. క్షేత్రస్థాయిలో ఉన్న పాత ఉద్యమకారులు, అసంతృప్త నేతలు మళ్లీ టీఆర్ఎస్ వైపు మళ్లే అవకాశం ఉంది. తెలంగాణ వాదాన్ని వదిలేసి జాతీయ రాజకీయాల వైపు వెళ్లిన కేసీఆర్ వ్యూహానికి, సొంత కుమార్తె రూపంలోనే అతిపెద్ద ప్రతిబంధకం ఎదురవుతోందని రాజకీయ విశ్లేషకులు అభిప్రాయపడుతున్నారు.