Pulse Polio 2026 : అలర్ట్ పేరెంట్స్.. రేపే పల్స్ పోలియో డ్రైవ్.. మీ పిల్లలకు ఈ రెండు చుక్కలు వేయించడం మర్చిపోవద్దు!

హైదరాబాద్, సూర్య న్యూస్ : తెలంగాణ ప్రభుత్వం (Telangana Government) జాతీయ ఆరోగ్య మిషన్ ఆధ్వర్యంలో పల్స్ పోలియో (Pulse Polio) 2026 కార్యక్రమాన్ని ప్రకటించింది. రాష్ట్ర వైద్య మరియు ఆరోగ్యశాఖ ఆధ్వర్యంలో ఈ కార్యక్రమం జరగనుంది. అధికారిక ప్రకటన ప్రకారం జూన్ 28వ తేదీ ఆదివారం ఉదయం 7 గంటల నుండి సాయంత్రం 5 గంటల వరకు పోలియో (Polio) చుక్కలు వేయనున్నారు. సున్నా నుండి ఐదు సంవత్సరాల వయస్సు ఉన్న ప్రతి చిన్నారికి ఈ చుక్కలు తప్పనిసరిగా వేయించాలి. గతంలో ఎన్నిసార్లు పోలియో చుక్కలు వేయించినా ఈసారి కూడా తప్పకుండా వేయించడం ముఖ్యం. ప్రతిసారి రెండు చుక్కలు వేయించడం ద్వారా పోలియోపై నిరంతరంగా విజయం సాధించవచ్చు.

​బూత్‌లకు (Polio Booths) వెళ్లి చుక్కలు వేయించలేని వారి కోసం జూన్ 29, 30 తేదీలలో ఇళ్ల వద్దే ప్రత్యేక కార్యక్రమం ఉంటుంది. ఆశా వర్కర్లు, ఏఎన్ఎం (ANM), అంగన్వాడీ సిబ్బంది ఇంటింటి సర్వే (Door to Door Survey) నిర్వహించి పిల్లలకు చుక్కలు వేస్తారు. ఈ ఏడాది పల్స్ పోలియో థీమ్ ఎవ్రీ డ్రాప్ కౌంట్స్, ఎవ్రీ చైల్డ్ మ్యాటర్స్ (Every Drop Counts, Every Child Matters) అని అధికారులు నిర్ణయించారు. వంద శాతం కవరేజ్ లక్ష్యంగా వైద్య ఆరోగ్య శాఖ సన్నాహాలు చేస్తోంది. ఈ డ్రైవ్‌లో బీఓపీవీ (bOPV) వ్యాక్సిన్ ఉపయోగిస్తున్నారు. ఇది ప్రపంచ ఆరోగ్య సంస్థ ద్వారా ఆమోదించబడిన అత్యంత సురక్షితమైన వ్యాక్సిన్. దీని వలన ఎలాంటి దుష్ప్రభావాలు ఉండవు. పిల్లలకు సాధారణ జ్వరం లేదా తేలికపాటి అనారోగ్యం ఉన్నా ఈ వ్యాక్సిన్ సురక్షితంగా వేయించవచ్చు.

పోలియో చుక్కలు వేయడానికి జిల్లావ్యాప్తంగా వివిధ రకాల బూత్‌లను ఏర్పాటు చేశారు. ప్రభుత్వ ఆసుపత్రులు, ప్రాథమిక ఆరోగ్య కేంద్రాలు, సబ్ సెంటర్లు, పాఠశాలలు మరియు అంగన్వాడీ కేంద్రాలలో ఫిక్స్‌డ్ బూత్‌లు (Fixed Booths) అందుబాటులో ఉంటాయి. ప్రయాణంలో ఉన్నవారి కోసం బస్ స్టాండ్‌లు, రైల్వే స్టేషన్లు, ఎయిర్‌పోర్టులు మరియు టోల్ ప్లాజాల వద్ద ట్రాన్సిట్ బూత్‌లు (Transit Booths) ఉంటాయి. భవన నిర్మాణ కార్మికులు ఉండే ప్రాంతాలు, ఇటుక బట్టీలు మరియు మురికివాడలలో మొబైల్ టీమ్‌లు (Mobile Teams) పర్యటిస్తాయి. భారతదేశంలో చివరి పోలియో కేసు 2011 జనవరి 13న నమోదైంది. ఈ విజయాన్ని ఇలాగే కొనసాగించాలంటే ప్రతి తల్లిదండ్రులు తమ బాధ్యతగా పిల్లలకు పోలియో చుక్కలు వేయించాలి.