న్యూఢిల్లీ, సూర్య న్యూస్ : అఫ్గానిస్థాన్‌తో జరిగిన రెండో టీ20 మ్యాచ్‌లో అద్భుత అర్ధశతకంతో కదంతొక్కిన భారత స్టార్ బ్యాటర్ సంజూ శాంసన్ (Sanju Samson) మ్యాచ్ అనంతరం జట్టు ఎంపికపై ఆసక్తికర వ్యాఖ్యలు చేశాడు. కేవలం 15 ఏళ్ల వయసులో భారత జట్టులోకి ఎంపికైన యువ సంచలనం వైభవ్ సూర్యవంశీని (Vaibhav Suryavanshi) తీసుకోవడం నూటికి నూరు శాతం సరైన నిర్ణయమేనని ఆయన సమర్థించాడు.
వైభవ్, అభిషేక్ శర్మ బయటి ప్రపంచానికి పోటీదారులుగా కనిపించినప్పటికీ, డ్రెస్సింగ్ రూమ్‌లో ఆటగాళ్లందరం ఒకే కుటుంబంలా ఉంటామని సంజూ తెలిపాడు. జట్టులో ఎవరికి అవకాశం రాలేదనే బాధ కంటే దేశం తరఫున మ్యాచ్ గెలవడమే తమ ప్రధాన లక్ష్యమని స్పష్టం చేశాడు. దేశవాళీ క్రికెట్లో దాదాపు 700 నుంచి 800 పరుగులు సాధించి అత్యుత్తమ ఫామ్‌లో ఉన్న కుర్రాడికి అవకాశం ఇవ్వడం సమంజసమేనని వివరించాడు.
కఠిన నిర్ణయాలు తప్పవు
గతంలో తాను కొన్ని మ్యాచ్‌ల్లో ఆశించిన స్థాయిలో రాణించలేకపోవడం వల్లే యాజమాన్యం కఠిన నిర్ణయాలు తీసుకుందని సంజూ గుర్తు చేసుకున్నాడు. ఐపీఎల్‌లో రాజస్థాన్ రాయల్స్ జట్టుకు కెప్టెన్‌గా ఉన్నప్పుడు తాను కూడా ఇలాంటి కఠిన నిర్ణయాలు తీసుకున్నానని చెప్పాడు. జట్టు కూర్పు విషయంలో కోచ్, కెప్టెన్ మధ్య సరైన సంభాషణ ఉండటం చాలా కీలకమని ఆయన అభిప్రాయపడ్డాడు. కాగా, ఢిల్లీ వేదికగా జరిగిన రెండో టీ20లో సంజూ కేవలం 22 బంతుల్లోనే 57 పరుగులు సాధించి భారత్‌ను ఏడు వికెట్ల తేడాతో గెలిపించిన విషయం తెలిసిందే. ఈ విజయంతో టీమిండియా సిరీస్‌లో 2-0 ఆధిక్యంలోకి దూసుకెళ్లింది.
ఈ వార్తపై మీ స్పందన?
🔥 గత 24 గంటల్లో అత్యధికంగా చదివిన వార్తలు
ఇవి గత 24 గంటల్లో ఎక్కువ మంది చదివిన వార్తలు
