
అమరావతి, సూర్య న్యూస్ : ఆంధ్రప్రదేశ్లో ఉపాధ్యాయ ఉద్యోగాల కోసం ఎదురుచూస్తున్న అభ్యర్థులకు పాఠశాల విద్యాశాఖ (School Education Department) తీపి కబురు అందించింది. ఏపీ డీఎస్సీ-2026 (AP DSC 2026) నోటిఫికేషన్లో భాగంగా సాధారణ పాఠశాలల్లో భర్తీ చేయనున్న మొత్తం 2,111 ఉపాధ్యాయ పోస్టుల విభాగాల వారీ, జిల్లాల వారీ వివరాలను అధికారులు స్పష్టంగా వెల్లడించారు. ప్రభుత్వ, జిల్లా పరిషత్, మండల పరిషత్ పాఠశాలలతో పాటు మున్సిపాలిటీలు, కార్పొరేషన్ల పరిధిలోని పాఠశాలల్లో ఈ నియామకాలు చేపట్టనున్నారు.
విభాగాల వారీగా ఖాళీల వివరాలు
విద్యాశాఖ విడుదల చేసిన నోటిఫికేషన్ ప్రకారం మొత్తం 2,111 సాధారణ ఉపాధ్యాయ పోస్టుల్లో ప్రభుత్వ, జడ్పీ, ఎంపీపీ పాఠశాలల పరిధిలో 1,709 పోస్టులు ఉన్నాయి. మున్సిపాలిటీలు, కార్పొరేషన్ల పరిధిలో 402 పోస్టులను భర్తీ చేయనున్నారు. కేటగిరీల వారీగా పరిశీలిస్తే.. సెకండరీ గ్రేడ్ టీచర్ (ఎస్జీటీ) విభాగంలో అత్యధికంగా 1,205 ఖాళీలను ప్రకటించారు. వీటిలో 1,069 జనరల్ పోస్టులు కాగా, 136 మున్సిపల్ పరిధిలో ఉన్నాయి. ఇక స్కూల్ అసిస్టెంట్ (ఎస్ఏ) విభాగంలో మొత్తం 906 పోస్టులు అందుబాటులో ఉండగా, అందులో 640 ప్రభుత్వ, జడ్పీ, ఎంపీపీ పాఠశాలల్లోనూ, 266 మున్సిపాలిటీ, కార్పొరేషన్ పాఠశాలల్లోనూ ఉన్నాయి.
జిల్లాల వారీగా అత్యధిక ఖాళీలు ఎక్కడంటే?
రాష్ట్రంలోని మొత్తం 26 జిల్లాల పరిధిలో ఈ పోస్టులను కేటాయించారు. జిల్లాల వారీగా చూస్తే కర్నూలు జిల్లాలో అత్యధికంగా 389 పోస్టులు (176 ఎస్ఏ, 213 ఎస్జీటీ) అందుబాటులో ఉన్నాయి. ఆ తర్వాత ప్రకాశం జిల్లాలో 266 పోస్టులు (96 ఎస్ఏ, 170 ఎస్జీటీ), వైఎస్ఆర్ కడప జిల్లాలో 206 పోస్టులు (48 ఎస్ఏ, 158 ఎస్జీటీ), నెల్లూరు జిల్లాలో 165, అల్లూరి సీతారామరాజు జిల్లాలో 159, నంద్యాల జిల్లాలో 157, చిత్తూరు జిల్లాలో 130 పోస్టులు ఉన్నాయి. విజయనగరం జిల్లాలో అతి తక్కువగా 4 పోస్టులు మాత్రమే ఉన్నాయి. సాధారణ పాఠశాలల్లోని ఈ 2,111 పోస్టులతో పాటు స్పెషల్ ఎడ్యుకేషన్ విభాగంలో మరో 350 పోస్టులు, గురుకుల సొసైటీల్లో 260 పోస్టులతో కలిపి డీఎస్సీ-2026 ద్వారా మొత్తం 2,721 ఉపాధ్యాయ ఖాళీలను ప్రభుత్వం భర్తీ చేస్తోంది.
దరఖాస్తు గడువు, పరీక్షల షెడ్యూల్
అర్హత, ఆసక్తి కలిగిన అభ్యర్థులు నవంబర్ 11 నుంచి నవంబర్ 30 వరకు అధికారిక వెబ్సైట్ ద్వారా ఆన్లైన్లో దరఖాస్తు చేసుకోవచ్చు. ఒక్కో పోస్టుకు దరఖాస్తు రుసుమును రూ.1,000గా నిర్ణయించారు. దరఖాస్తు చేసుకున్న అభ్యర్థులకు డిసెంబర్ 5న ఆన్లైన్ మాక్ టెస్ట్ నిర్వహించనుండగా, డిసెంబర్ 14 నుంచి హాల్ టికెట్లు అందుబాటులోకి రానున్నాయి. కంప్యూటర్ ఆధారిత పరీక్షలను (సీబీటీ) డిసెంబర్ 20 నుంచి 2027 జనవరి 13 వరకు నిర్వహించనున్నట్లు విద్యాశాఖ ప్రకటించింది.
ఎంపిక విధానం ఇలా..
ఉపాధ్యాయ నియామక పరీక్షలో (టీఆర్టీ) సాధించిన మార్కులకు 80 శాతం వెయిటేజీ, ఏపీ టెట్ లేదా సీటెట్ మార్కులకు 20 శాతం వెయిటేజీ ఇచ్చి తుది మెరిట్ జాబితాను రూపొందిస్తారు. 18 నుంచి 44 ఏళ్ల మధ్య వయసున్న అభ్యర్థులు ఈ పోస్టులకు అర్హులు. ఎస్సీ, ఎస్టీ, బీసీ, ఈడబ్ల్యూఎస్ అభ్యర్థులకు ఐదేళ్లు, దివ్యాంగులకు పదేళ్ల వరకు గరిష్ఠ వయోపరిమితిలో సడలింపు కల్పించారు. ఎస్జీటీ పోస్టులకు ఇంటర్మీడియట్తో పాటు డీఈడీ, టెట్ పేపర్-1 అర్హత ఉండాలి. స్కూల్ అసిస్టెంట్ పోస్టులకు సంబంధిత సబ్జెక్టులో డిగ్రీ, బీఈడీతో పాటు టెట్ పేపర్-2 ఉత్తీర్ణత తప్పనిసరి.
ఈ వార్తపై మీ స్పందన?
🔥 గత 24 గంటల్లో అత్యధికంగా చదివిన వార్తలు
ఇవి గత 24 గంటల్లో ఎక్కువ మంది చదివిన వార్తలు



