పటాన్చెరు : సంగారెడ్డి జిల్లా పటాన్చెరు నియోజకవర్గంలోని ఇస్నాపూర్ మున్సిపాలిటీలోని శ్రీ రామాలయంలో భవ్య శ్రీ రామకథా వేడుకలు అత్యంత వైభవంగా, భక్తిశ్రద్ధలతో జరుగుతున్నాయి. ఈ మూడు రోజుల ఆధ్యాత్మిక కార్యక్రమానికి పటాన్చెరు శాసనసభ్యులు గూడెం మహిపాల్ రెడ్డి ముఖ్య అతిథిగా హాజరై, ప్రత్యేక పూజలు నిర్వహించారు. ఎమ్మెల్యే ఆధ్వర్యంలో నిర్వహిస్తున్న ఈ రామకథా ప్రవచనాలకు నియోజకవర్గంలోని భక్తులు వేలాదిగా తరలివచ్చి, భగవంతుని నామస్మరణతో పునీతులవుతున్నారు.
వారణాసికి చెందిన ప్రముఖ ప్రవచనకర్త పరమ పూజ్య శ్రీ గణేష్ మహారాజ్ ఈ సందర్భంగా రామకథ యొక్క విశిష్టతను, ప్రాశస్త్యాన్ని భక్తులకు కళ్లకు కట్టినట్లు వివరించారు. భగవంతుని లీలలు, రాముని ఆదర్శ జీవనం గురించి చెప్పిన ఆయన ప్రవచనాలతో ఇస్నాపూర్ ప్రాంతం ఆధ్యాత్మిక శోభను సంతరించుకుంది. భక్తులకు ఎలాంటి అసౌకర్యం కలగకుండా నిర్వాహకులు భారీ ఏర్పాట్లు చేశారు. తీర్థ ప్రసాదాల వితరణ, అన్నదానం వంటి కార్యక్రమాలు సాఫీగా జరుగుతున్నాయి.
ఈ వేడుకలో పటాన్చెరు మార్కెట్ కమిటీ మాజీ చైర్మన్ విజయ్ కుమార్, సీనియర్ నాయకులు గూడెం మధుసూదన్ రెడ్డి, ఉత్తర భారతీయ సంక్షేమ సంఘం ప్రతినిధులు సంజయ్ కుమార్ సింగ్, సునీల్ కుమార్ సింగ్, టింకు పటేల్, రమేష్ యాదవ్, ప్రిన్స్ సింగ్, రాకేష్ చౌబే, శ్యామ్ సుందర్, గుప్తాజీ, సంతోష్ సింగ్ తదితర ప్రముఖులు పాల్గొన్నారు. శ్రీ రామ సేవా సదన్ అధ్యక్షుడు హర్ష్ వర్ధన్ సింగ్ సుమన్ ఆధ్వర్యంలో భక్తులందరికీ తీర్థ ప్రసాదాలు వితరించబడ్డాయి.
ఎమ్మెల్యే గూడెం మహిపాల్ రెడ్డి మాట్లాడుతూ, రామకథ వినడం ద్వారా మనసు శాంతి పొందుతుందని, సమాజంలో ఆధ్యాత్మికత పెరగాలని, భక్తి భావనలు వృద్ధి చెందాలని కోరారు. ఈ కార్యక్రమం నియోజకవర్గంలో భక్తి ఉద్వేగాలను మరింత పెంచిందని, ఇలాంటి ఆధ్యాత్మిక వేడుకలు కొనసాగాలని ఆయన ఆశాభావం వ్యక్తం చేశారు.
ఈ రామకథా వేడుకలు ఇస్నాపూర్లో ఆధ్యాత్మిక వాతావరణాన్ని సృష్టించాయి. భక్తులు రామనామ స్మరణతో ముక్తి పొందుతున్నారు. మరిన్ని రోజుల పాటు ఈ కార్యక్రమం కొనసాగనుంది.