RRB Recruitment 2026 : రైల్వేలో భారీ కొలువులకు గ్రీన్ సిగ్నల్.. 3,993 పోస్టులు.. పూర్తి వివరాలు ఇవే!

New Delhi, Surya News : రైల్వే ఉద్యోగం సాధించడమే లక్ష్యంగా ఎదురుచూస్తున్న నిరుద్యోగ అభ్యర్థులకు రైల్వే రిక్రూట్‌మెంట్ బోర్డు (RRB JE) అదిరిపోయే శుభవార్త చెప్పింది. దేశవ్యాప్తంగా వివిధ రైల్వే జోన్లు, ప్రొడక్షన్ యూనిట్లలో ఖాళీగా ఉన్న పోస్టుల భర్తీకి సంబంధించి సెంట్రలైజ్డ్ ఎంప్లాయ్‌మెంట్ నోటిఫికేషన్ (CEN 04/2026)ను అధికారికంగా విడుదల చేసింది. ఈ తాజా నోటిఫికేషన్ ద్వారా దేశవ్యాప్తంగా మొత్తం 3,993 జూనియర్ ఇంజనీర్ (JE), డిపో మెటీరియల్ సూపరింటెండెంట్ (DMS), కెమికల్ అండ్ మెటలర్జికల్ అసిస్టెంట్ (CMA) పోస్టులను భర్తీ చేయనున్నారు. ఇందులో సికింద్రాబాద్ జోన్‌కు సంబంధించి 110 పోస్టులు కేటాయించారు.

అర్హత కలిగిన అభ్యర్థులు ఆన్‌లైన్ విధానంలో దరఖాస్తు చేసుకోవడానికి సెప్టెంబర్ 13, 2026 వరకు అవకాశం కల్పించారు. ఫీజు చెల్లింపునకు సెప్టెంబర్ 15 చివరి తేదీ కాగా, దరఖాస్తుల సవరణ కోసం సెప్టెంబర్ 16 నుండి 25 వరకు ఎడిట్ విండో అందుబాటులో ఉంటుంది.

ముఖ్య వివరాలు

విద్యార్హత: సంబంధిత ఇంజనీరింగ్ స్ట్రీమ్‌లో 3 సంవత్సరాల డిప్లొమా లేదా సంబంధిత ఇంజనీరింగ్ డిగ్రీ (BE/BTech) ఉత్తీర్ణులై ఉండాలి. CMA పోస్టులకు బీఎస్సీ (BSc – Chemistry related) పూర్తి చేసిన వారు కూడా అర్హులు.

వయోపరిమితి: జనవరి 1, 2027 నాటికి అభ్యర్థుల వయస్సు 18 నుండి 33 సంవత్సరాల మధ్య ఉండాలి. ప్రభుత్వ నిబంధనల ప్రకారం ఎస్సీ, ఎస్టీ వర్గాలకు 5 ఏళ్లు, ఓబీసీ-ఎన్‌సీఎల్ అభ్యర్థులకు 3 ఏళ్లు, పీడబ్ల్యూబీడీ అభ్యర్థులకు గరిష్ట వయోపరిమితిలో సడలింపు వర్తిస్తుంది.

దరఖాస్తు ఫీజు: జనరల్, ఓబీసీ, ఈడబ్ల్యూఎస్ అభ్యర్థులకు రూ. 500 (సీబీటీ-1 పరీక్షకు హాజరైన తర్వాత రూ. 400 రీఫండ్ అవుతాయి). ఎస్సీ, ఎస్టీ, దివ్యాంగులు, మహిళా అభ్యర్థులు, మాజీ సైనికోద్యోగులకు రూ. 250 (సీబీటీ-1 పరీక్షకు హాజరైతే పూర్తి ఫీజు రీఫండ్ వర్తిస్తుంది).

ఎంపిక విధానం & వేతనంఅభ్యర్థుల ఎంపిక రెండు దశల కంప్యూటర్ బేస్డ్ టెస్ట్ (CBT-1, CBT-2), సర్టిఫికెట్ల పరిశీలన, రైల్వే మెడికల్ టెస్ట్ ఆధారంగా జరుగుతుంది. ఎంపికైన వారికి 7వ వేతన సంఘం లెవల్-6 కింద ప్రారంభ ప్రాథమిక వేతనం నెలకు రూ. 35,400తో పాటు కేంద్ర ప్రభుత్వ అలవెన్సులు లభిస్తాయి.

అధికారిక వెబ్‌సైట్ & నోటిఫికేషన్ లింక్స్

ఆన్‌లైన్ దరఖాస్తు పోర్టల్: https://www.rrbapply.gov.in

సికింద్రాబాద్ అధికారిక వెబ్‌సైట్: https://rrbsecunderabad.gov.in

నోటిఫికేషన్ ధ్రువీకరణ: అధికారిక సమాచారం, పూర్తి పోస్టుల వారీ వివరాల కోసం అభ్యర్థులు rrbapply.gov.in లేదా సంబంధిత రీజినల్ ఆర్ఆర్బీ వెబ్‌సైట్లలో అందుబాటులో ఉన్న CEN 04/2026 Detailed Notification PDFను పరిశీలించవచ్చు.