హైదరాబాద్, సూర్య న్యూస్ : ఉప్పల్ వేదికగా భారత్‌తో జరిగిన నాలుగో టీ20 మ్యాచ్‌లో వెస్టిండీస్ 24 పరుగుల తేడాతో ఘన విజయం సాధించింది. 248 పరుగుల భారీ లక్ష్య ఛేదనలో భారత జట్టు నిర్ణీత ఓవర్లలో 223/9 స్కోరుకే పరిమితమైంది. ఈ విజయంతో ఇరు జట్ల మధ్య సిరీస్ డిసైడర్ మ్యాచ్ శనివారం బెంగళూరులో జరగనుంది.
భారీ లక్ష్య ఛేదనలో భారత ఓపెనర్ శాంసన్ (56) మెరుపు ఆరంభం ఇచ్చినప్పటికీ, అతడు ఔటైన తర్వాత స్కోరు బోర్డు వేగం మందగించింది. మిడిలార్డర్‌లో తిలక్ (43), నితీశ్ (41) రాణించారు. వెస్టిండీస్ బౌలర్లలో పాల్ 5 వికెట్లు పడగొట్టి సత్తా చాటగా, ఇన్నింగ్స్ చివర్లో అర్ష్‌దీప్ రిటైర్డ్ హర్ట్ కావడంతో అంపైర్లు విండీస్ గెలిచినట్లు ప్రకటించారు.
రికార్డులు సృష్టించిన హోప్, అభిషేక్
ఈ మ్యాచ్‌లో సెంచరీతో అదరగొట్టిన వెస్టిండీస్ ఓపెనర్ హోప్ అరుదైన రికార్డు సృష్టించాడు. భారత్‌తో జరిగిన ఒకే టీ20 సిరీస్‌లో 2 సెంచరీలు చేసిన ఫస్ట్ బ్యాటర్‌గా, అలాగే టీ20ల్లో విండీస్ తరఫున అత్యధిక సెంచరీలు బాదిన ప్లేయర్‌గా చరిత్రకెక్కాడు. ఇప్పటివరకు అంతర్జాతీయ టీ20ల్లో మూడు సెంచరీలు (రెండు భారత్‌పై, ఒకటి ఆస్ట్రేలియాపై) చేసిన హోప్, ఆ మూడింట్లోనూ ఒకే స్కోరు (102 నాటౌట్) నమోదు చేయడం విశేషం.
భారత ఓపెనర్ అభిషేక్ శర్మ ఈ మ్యాచ్‌లో 29 పరుగులు (ఒక సిక్స్, 3 ఫోర్లు) చేసి అంతర్జాతీయ టీ20ల్లో ఒక సంవత్సరంలో అత్యధిక సిక్సర్లు (69) కొట్టిన బ్యాటర్‌గా ఆల్ టైమ్ రికార్డు నెలకొల్పాడు. 2022లో సూర్యకుమార్ యాదవ్ నెలకొల్పిన 68 సిక్సర్ల రికార్డును అభిషేక్ బ్రేక్ చేశాడు. అయితే, 200కు పైగా పరుగుల భారీ లక్ష్య ఛేదనల్లో అభిషేక్ శర్మ, శ్రేయస్ అయ్యర్ వరుసగా చేతులెత్తేయడం జట్టును కలవరపెడుతోంది. 200+ రన్ ఛేజ్‌లలో అభిషేక్ కనీసం ఒక్క హాఫ్ సెంచరీ కూడా చేయలేకపోగా, అయ్యర్ సైతం తక్కువ స్కోర్లకే పరిమితమవుతూ తీవ్రంగా నిరాశపరుస్తున్నారు.
ఈ వార్తపై మీ స్పందన?
🔥 గత 24 గంటల్లో అత్యధికంగా చదివిన వార్తలు
ఇవి గత 24 గంటల్లో ఎక్కువ మంది చదివిన వార్తలు
