హైదరాబాద్, సూర్య న్యూస్: ఉమ్మడి ఆంధ్రప్రదేశ్ (Andhra Pradesh) చివరి ముఖ్యమంత్రి, ప్రస్తుత భారతీయ జనతా పార్టీ (BJP) నేత నల్లారి కిరణ్ కుమార్ రెడ్డికి గవర్నర్ పదవి దక్కనుందని రాజకీయ వర్గాల్లో జోరుగా చర్చ జరుగుతోంది. ప్రధానమంత్రి నరేంద్ర మోదీ విదేశీ పర్యటన ముగించుకుని తిరిగి వచ్చిన తర్వాత కేంద్ర కేబినెట్ పునర్వ్యవస్థీకరణ జరగనుందని వార్తలు వస్తున్నాయి.
ఈ క్రమంలోనే పలు రాష్ట్రాల గవర్నర్లను కూడా మార్చే అవకాశం ఉందని సమాచారం. ఈ మార్పుల్లో భాగంగా నల్లారి పేరు కూడా కేంద్ర ప్రభుత్వ పరిశీలనలో ఉన్నట్లు జాతీయ స్థాయిలో ప్రచారం జరుగుతోంది. ఆయనకు ఉన్న సుదీర్ఘ రాజకీయ అనుభవం, స్పీకర్గా మరియు ముఖ్యమంత్రిగా పనిచేసిన తీరును అధిష్టానం పరిగణనలోకి తీసుకుంటున్నట్లు తెలుస్తోంది. గతంలో కాంగ్రెస్ పార్టీని వీడి బీజేపీలో చేరినప్పటి నుంచి ఆయనకు తగిన ప్రాధాన్యం ఇవ్వాలని పార్టీ పెద్దలు యోచిస్తున్నారని టాక్ వినిపిస్తోంది.
అయితే ఈ వార్తలపై రాష్ట్రపతి భవన్ కానీ కేంద్ర ప్రభుత్వం కానీ ఎలాంటి అధికారిక ప్రకటన చేయలేదు. ఏ రాష్ట్రానికి ఆయనను పంపబోతున్నారనే దానిపై కూడా కనీస స్పష్టత లేదు. గతంలో 2024లో కూడా ఇలాగే కొత్త గవర్నర్లు వస్తారని ప్రచారం జరిగింది. కానీ అది వాస్తవ రూపం దాల్చలేదు. సెప్టెంబర్ మొదటి వారంలో విడుదలయ్యే కొత్త గవర్నర్ల జాబితాలో ఆయన పేరు ఉంటే తప్ప దీనిపై క్లారిటీ రాదు.
నల్లారి కిరణ్ కుమార్ రెడ్డికి గవర్నర్ పదవి అనేది ప్రస్తుతం రాజకీయ వర్గాల్లో జరుగుతున్న ప్రచారం మాత్రమే. ఇది నిజమా కాదా అనేది కేంద్ర ప్రభుత్వం నుంచి అధికారిక ప్రకటన వస్తేనే స్పష్టమవుతుంది. అప్పటి వరకు ఈ వార్తలను కేవలం రాజకీయ ఊహాగానాలుగా మాత్రమే పరిగణించాలి.
🔥 గత 24 గంటల్లో అత్యధికంగా చదివిన వార్తలు
ఇవి గత 24 గంటల్లో ఎక్కువ మంది చదివిన వార్తలు
