|  
● FLASH NEWS
Warangal: రూ.50 వేల అప్పు కోసం దంపతుల ఆత్మహత్య.. సీవీ ఆనంద్ ఆవేదన  •  SRH: సన్‌రైజర్స్ రిటెన్షన్ లిస్టులో సంచలనం.. ట్రావిస్ హెడ్ ఎందుకు లేరో తెలుసా?  •  PV Sindhu: నాలుగేళ్ల తర్వాత మళ్లీ టాప్ 5లో సింధు.. ఈ ఎదుగుదల వెనుక కథేంటి?  •  SAFF: పాకిస్తాన్‌పై భారత్‌కు పదో ట్రోఫీ.. 88వ నిమిషంలో ఏం జరిగిందో తెలుసా?  •  KTR: కేటీఆర్ సాయంతో కోట్లు టర్నోవర్ సాధిస్తున్న దివ్యాంగుడు  • 
Skip to content

SAFF: పాకిస్తాన్‌పై భారత్‌కు పదో ట్రోఫీ.. 88వ నిమిషంలో ఏం జరిగిందో తెలుసా?

ఢాకా, సూర్య న్యూస్ : దక్షిణాసియా ఫుట్‌బాల్‌లో భారత్ (India) మరోసారి తన ఆధిపత్యాన్ని చాటుకుంది. ఢాకాలోని నేషనల్ స్టేడియం (National Stadium) వేదికగా మంగళవారం జరిగిన సాఫ్ ఛాంపియన్‌షిప్ (SAFF Championship) ఫైనల్లో చిరకాల ప్రత్యర్థి పాకిస్తాన్ (Pakistan)ను 2-1 తేడాతో ఓడించి టైటిల్ కైవసం చేసుకుంది. తొలి అర్ధభాగంలో గోల్ వెనుకబడినా, రెండో అర్ధభాగంలో పుంజుకున్న భారత్ తరఫున సుహైల్ అహ్మద్ భట్ (Suhail Ahmad Bhat), సందీప్ మండి (Sandip Mandi) గోల్స్ చేశారు. ఈ టోర్నీ చరిత్రలో భారత్‌కు ఇది పదో టైటిల్. వరుసగా మూడు టోర్నీల్లో విజేతగా నిలవడం మాత్రం ఇదే తొలిసారి.

2021లో మాలేలో జరిగిన ఫైనల్లో నేపాల్‌ను 3-0తో, 2023లో బెంగళూరులో కువైట్‌ను పెనాల్టీ షూటౌట్‌లో ఓడించి భారత్ టైటిళ్లు గెలిచింది. ఈసారి సీనియర్ జట్టు న్యూజిలాండ్‌తో స్నేహపూర్వక మ్యాచ్‌లు ఆడుతుండటంతో, ఎక్కువగా యువ ఆటగాళ్లతో కూడిన జట్టుకు అండర్-23 జట్టు కోచ్ నౌషాద్ మూసా శిక్షణ బాధ్యతలు చూశారు. డిఫెండర్ చింగ్లెన్‌సనా సింగ్ కొన్షామ్ జట్టుకు సారథ్యం వహించాడు. “మరో ఫైనల్‌కు చేరడం ఆటగాళ్లు, సహాయ సిబ్బంది కష్టానికి, సమష్టి కృషికి నిదర్శనం” అని ఫైనల్‌కు ముందు మూసా వ్యాఖ్యానించినట్లు సమాఖ్య వెల్లడించింది.

తొలి అర్ధభాగంలో పాక్ జోరు

ఫైనల్ ఆరంభం నుంచే పాకిస్తాన్ దూకుడుగా ఆడింది. విదేశీ క్లబ్బుల్లో ఆడుతున్న పలువురు ఆటగాళ్లు నాకౌట్ దశలో జట్టుతో చేరడంతో ఆ జట్టు బలం పెరిగింది. రెండు వైపుల నుంచి వేగంగా దాడులు చేస్తూ భారత పెనాల్టీ ప్రాంతంలోకి పదేపదే బంతిని పంపింది. 17వ నిమిషంలో ముహమ్మద్ అలీ ఖాన్ ప్రయత్నాన్ని భారత రక్షణ శ్రేణి చివరి క్షణంలో అడ్డుకుంది. కాసేపటికే మెకీల్ అబ్దుల్లా దగ్గరి నుంచి కొట్టిన షాట్‌ను గోల్‌కీపర్ అర్ష్ అన్వర్ షేక్ చాకచక్యంగా ఆపాడు. నీటి విరామం తర్వాత భారత్ కాస్త కుదురుకున్నా, ఆ జోరు ఎంతోసేపు నిలవలేదు. ఎంత ప్రతిఘటించినా తొలి అర్ధభాగం అదనపు సమయంలో భారత్ గోల్ సమర్పించుకుంది. ఎడమ వైపు నుంచి జునైద్ షా పంపిన బంతి లుంగ్‌డిమ్‌కు తగిలి ఆలంగీర్ ఘాజీ వద్ద పడింది. బంతిని అదుపులోకి తీసుకున్న ఘాజీ కుడికాలితో దూరపు మూలకు పంపి పాక్‌కు ఆధిక్యం అందించాడు.

రెడ్ కార్డుతో మారిన మ్యాచ్

విరామం తర్వాత కోచ్ మూసా మంగ్లెన్‌థాంగ్ కిప్‌గెన్ స్థానంలో మెకార్టన్ నిక్సన్‌ను బరిలోకి దించారు. ఈ మార్పుతో భారత ఆటలో వేగం పెరిగింది. 51వ నిమిషంలో నిక్సన్ అందించిన బంతితో విష్ణు కొట్టిన షాట్ గోల్‌కీపర్ యూసుఫ్ బట్‌కు తగిలి పోస్ట్‌ను తాకి వెనక్కి వచ్చింది. బ్రిసన్ ఫెర్నాండెస్‌ను ప్రమాదకరంగా అడ్డుకున్న జునైద్ షాకు మొదట రిఫరీ ఎలాంటి శిక్షా విధించలేదు. వీడియో సమీక్ష తర్వాత 59వ నిమిషంలో నేరుగా రెడ్ కార్డు చూపించారు. పది మందితో మిగిలిన పాక్‌ను భారత్ నిమిషం వ్యవధిలోనే దెబ్బకొట్టింది. కుడి వైపు నుంచి లుంగ్‌డిమ్ పంపిన బంతిని నిక్సన్ సరిగా అందుకోలేకపోగా, పక్కనే ఉన్న సుహైల్ భట్ నెట్‌లోకి నెట్టి స్కోరు సమం చేశాడు.

88వ నిమిషంలో మండి హెడర్

స్కోరు సమమయ్యాక భారత్ పూర్తిగా పైచేయి సాధించింది. 72వ నిమిషంలో బ్రిసన్, విష్ణు స్థానంలో అబ్దుల్ రబీహ్, ఇర్ఫాన్ యద్వాడ్ మైదానంలోకి వచ్చారు. పాక్ ఆటగాళ్లు తమ పెనాల్టీ ప్రాంతంలోనే గుమిగూడి రక్షణాత్మకంగా ఆడటంతో గోల్ దారి దొరకలేదు. మ్యాచ్ అదనపు సమయంలోకి వెళ్తుందనుకుంటున్న దశలో రబీహ్ కొట్టిన కార్నర్ కిక్‌ను డిఫెండర్ సందీప్ మండి తలతో కిందికి కొట్టాడు. నేలను తాకి పైకి లేచిన బంతి గోల్‌కీపర్ బట్‌కు అందకుండా పైమూలలోకి దూసుకెళ్లింది. చొక్కా విప్పి సంబరాలు చేసుకున్న మండి గోల్‌తోనే భారత్ విజయం ఖాయమైంది.

పాకిస్తాన్ ఈ టోర్నీ ఫైనల్‌కు చేరడం ఇదే తొలిసారి. సెమీస్‌లో ఆతిథ్య బంగ్లాదేశ్‌ను 1-0తో ఓడించింది. భారత్ గ్రూప్ దశలో ఈ నెల 5న పాక్‌పై 3-2తో, మాల్దీవులపై 1-0తో గెలిచి, సెమీస్‌లో భూటాన్‌ను 2-1తో ఓడించింది. ఆ మ్యాచ్‌లో విష్ణు, కెప్టెన్ చింగ్లెన్‌సనా గోల్స్ చేశారు. దేశం తరఫున చింగ్లెన్‌సనాకు అదే తొలి గోల్. పాక్‌తో తొలి మ్యాచ్‌లోనూ భట్ రెండు గోల్స్ చేశాడు. మొత్తం నాలుగు గోల్స్‌తో అత్యధిక గోల్స్ చేసిన ఆటగాడిగా నిలిచిన 21 ఏళ్ల భట్ టోర్నీ అత్యుత్తమ ఆటగాడి పురస్కారం కూడా అందుకున్నాడు. ఉత్తమ గోల్‌కీపర్‌గా అర్ష్ ఎంపికయ్యాడు. “ఈ వ్యక్తిగత పురస్కారాలు నాకెంతో విలువైనవి. కానీ భారత్ పదో సాఫ్ టైటిల్ గెలవడమే అన్నింటికంటే పెద్ద విజయం” అని భట్ అన్నట్లు అఖిల భారత ఫుట్‌బాల్ సమాఖ్య తెలిపింది.

మ్యాచ్ అనంతరం పాక్ ఆటగాళ్లు వరుసగా నిలబడి భారత జట్టుకు గౌరవ వందనం పలికారు. వరుసగా మూడోసారి టైటిల్ గెలిచిన జట్టుకు కేంద్ర క్రీడల మంత్రి మన్‌సుఖ్ మాండవీయ సామాజిక మాధ్యమాల వేదికగా అభినందనలు తెలిపారు.

ఈ వార్తపై మీ స్పందన?

🔥 గత 24 గంటల్లో అత్యధికంగా చదివిన వార్తలు

ఇవి గత 24 గంటల్లో ఎక్కువ మంది చదివిన వార్తలు