కాకినాడ, సూర్య న్యూస్: కాకినాడ జిల్లాలో పెను సంచలనం సృష్టించిన పంచాయతీ రాజ్ (Panchayat Raj Department) అసిస్టెంట్ ఇంజినీర్ (AE Nukaraju) నూకరాజు కుటుంబం సామూహిక ఆత్మహత్య కేసులో (Kakinada Suicide Case) ప్రధాన నిందితుడు షేక్ సాధిక్ ఖాన్ (Sadhik Khan) పోలీసులకు చిక్కాడు. ఎనిమిది ప్రత్యేక బృందాలతో ఐదు రోజుల పాటు ముమ్మరంగా గాలించిన ఏపీ పోలీసులు దేశ రాజధాని ఢిల్లీలో నిందితుడిని అదుపులోకి తీసుకున్నారు. అతన్ని కాకినాడ లేదా రాజమహేంద్రవరం తీసుకువచ్చి విచారించేందుకు ఏర్పాట్లు చేస్తున్నారు.
గోదావరి నదిలో దూకిన కుటుంబం
పిఠాపురం మండలంలో ఏఈగా విధులు నిర్వర్తిస్తున్న గొల్లపూడి నూకరాజు, ఆయన భార్య మీనా, కుమార్తె సౌజన్య, మనవడు కార్తికేయ రెడ్డి రాజమహేంద్రవరం రోడ్-కం-రైల్ బ్రిడ్జి పైనుంచి గోదావరి నదిలోకి దూకి బలవన్మరణానికి పాల్పడ్డారు. ఈ దారుణ ఘటనలో ఈత రావడంతో పదేళ్ల కార్తికేయ ప్రాణాలతో బయటపడ్డాడు. నూకరాజు, సౌజన్య మృతదేహాలు నదిలో లభించగా, మీనా ఆచూకీ కోసం గాలింపు కొనసాగుతోంది. ఒక నిండు కుటుంబం అంతా కలిసి ప్రాణాలు తీసుకునేలా సాధిక్ ఖాన్ సాగించిన తీవ్ర బ్లాక్‌మెయిల్, బెదిరింపులే ప్రధాన కారణమని ఆధారాలు స్పష్టం చేస్తున్నాయి.
మాయమాటలతో వల.. ఆస్తుల కోసం వేధింపులు
జూలై 2న సౌజన్య భర్త జగదీశ్వర రెడ్డి మరణించిన తర్వాత సాధిక్ ఖాన్ ఆ కుటుంబాన్ని టార్గెట్ చేశాడు. విషపు ఇంజెక్షన్ ఇచ్చి భర్తను చంపేశాడని, ఆపై తనను బ్లాక్‌మెయిల్ చేసి బ్యాంక్ లాకర్లు, నగదు, ఆస్తుల పత్రాలు లాక్కున్నాడని సౌజన్య రాసిన లేఖలు బయటపడ్డాయి. అంతేకాకుండా మతం మారాలంటూ ఒత్తిడి తెచ్చి, కుటుంబాన్ని చంపేస్తానని తీవ్రంగా బెదిరించాడు. ఈ విషయాన్ని తట్టుకోలేక నూకరాజు స్వయంగా సాధిక్ ఇంటికి వెళ్లి వేడుకున్నా ఫలితం లేకుండా పోయింది. చివరకు ఆస్తులను కూతుళ్లకు బదలాయించే వీలునామా రాసి కుటుంబం అంతా ప్రాణాలు తీసుకుంది.
క్రీడాకారుడి ముసుగులో కరుడుగట్టిన నేర చరిత్ర
గతంలో క్రాస్‌బో షూటింగ్‌లో బంగారు పతకాలు సాధించిన సాధిక్ ఖాన్, కాకినాడలో ప్రో షూటింగ్ అకాడమీని ప్రారంభించాడు. పెద్ద పోలీసు అధికారులు, ప్రముఖులతో దిగిన ఫోటోలను సోషల్ మీడియాలో పెట్టి ప్రజలను నమ్మించేవాడు. కార్తికేయకు షూటింగ్ శిక్షణ ఇచ్చే క్రమంలోనే ఈ కుటుంబంతో పరిచయం పెంచుకుని, ఆపై వారి సంపదపై కన్నేశాడు. విశ్వసనీయ వర్గాల సమాచారం ప్రకారం, ఇతను గతంలో కూడా పలువురిని మోసం చేసిన ఆరోపణలు ఉన్నాయి. పాస్‌పోర్ట్ సీజ్ చేసి లుక్‌అవుట్ నోటీసులు జారీ చేయడంతో విదేశాలకు పారిపోయే యత్నంలో ఉండగా ఢిల్లీలో దొరికిపోయాడు.
సమాజానికి హెచ్చరిక.. తల్లిదండ్రులు అప్రమత్తం కావాలి
క్రీడలు, కోచింగ్ సెంటర్లు, ప్రైవేట్ అకాడమీల పేరుతో ముసుగు వేసుకుని తిరిగే ఇలాంటి క్రూర మృగాల పట్ల ప్రతి ఒక్కరూ అప్రమత్తంగా ఉండాలి. పిల్లలను ఏదైనా సంస్థల్లో చేర్పించే ముందు లేదా కొత్త వ్యక్తులతో పరిచయాలు పెంచుకునే ముందు వారి నేపథ్యాన్ని క్షుణ్ణంగా పరిశీలించాలి. ముఖ్యంగా ఒంటరిగా ఉన్న మహిళలు, సంపన్న కుటుంబాలను లక్ష్యంగా చేసుకుని బ్లాక్‌మెయిలింగ్‌కు పాల్పడే నేరగాళ్లపై సమాజం కన్నేసి ఉంచాలి. ఇంతటి దారుణానికి ఒడిగట్టిన సాధిక్ ఖాన్‌పై హత్య, ఆత్మహత్య ప్రేరణ సెక్షన్ల కింద అత్యంత కఠినమైన శిక్షలు అమలు చేయాలని ప్రజలు డిమాండ్ చేస్తున్నారు.
ఈ వార్తపై మీ స్పందన?
🔥 గత 24 గంటల్లో అత్యధికంగా చదివిన వార్తలు
ఇవి గత 24 గంటల్లో ఎక్కువ మంది చదివిన వార్తలు
