
హైదరాబాద్, సూర్య న్యూస్ : సమాజ సేవతో పాటు సాహిత్యం, జర్నలిజం రంగాలను ప్రోత్సహిస్తున్న అంజిబాబు ఫౌండేషన్ కృషిని రాష్ట్ర మంత్రి పొంగులేటి శ్రీనివాసరెడ్డి అభినందించారు. ఫౌండేషన్ వ్యవస్థాపకులు, సీఈవో నాగుల అంజిబాబు శనివారం బంజారాహిల్స్లోని మినిస్టర్స్ క్వార్టర్స్లో మంత్రిని మర్యాదపూర్వకంగా కలిసి, జర్నలిజం విద్యార్థులు రూపొందించిన “గురుదక్షిణ” కవితా సంకలనాన్ని అందజేశారు.
మంత్రి ప్రశంసలు.. ఫౌండేషన్కు అభినందనలు
ఈ సందర్భంగా అంజిబాబు ఫౌండేషన్ చేపడుతున్న సామాజిక సేవా కార్యక్రమాలతో పాటు సాహితీ, మీడియా రంగాలకు అందిస్తున్న ప్రోత్సాహాన్ని మంత్రి ప్రశంసించారు. భవిష్యత్తులోనూ ఫౌండేషన్ ఆధ్వర్యంలో మరిన్ని సేవా కార్యక్రమాలు నిర్వహిస్తూ ప్రజలకు చేరువ కావాలని నాగుల అంజిబాబుకు సూచించి ఆశీస్సులు అందించారు. సమాజంలో సానుకూల మార్పు తీసుకురావడంలో సేవా సంస్థల పాత్ర కీలకమని ఈ సందర్భంగా పేర్కొన్నారు.

జర్నలిజం విద్యార్థుల కృషికి ప్రశంస
సురవరం ప్రతాపరెడ్డి తెలుగు విశ్వవిద్యాలయం జర్నలిజం విద్యార్థులు “గురుదక్షిణ” పేరుతో కవితా సంకలనాన్ని రూపొందించడం అభినందనీయమని మంత్రి పేర్కొన్నారు. ఎలక్ట్రానిక్, సోషల్ మీడియా విస్తరిస్తున్న ప్రస్తుత పరిస్థితుల్లో వార్తల నిర్వహణతో పాటు రచనా నైపుణ్యాలు కలిగిన శిక్షణ పొందిన జర్నలిస్టుల అవసరం ఉందని అభిప్రాయపడ్డారు. మంచి రచనలకు ఎప్పటికీ ఆదరణ ఉంటుందని తెలిపారు.
ఈ సంకలనం రూపకల్పనలో కృషి చేసిన సంపాదకులు కొండూరి కోటి బాబు, ఎస్. కళ్యాణ్ దాస్, నాగుల అంజిబాబులను మంత్రి అభినందించారు. విద్యార్థులు చదువు, పరిశోధన, రచనా వ్యాసంగంపై ఆసక్తి పెంచుకోవడానికి ఇలాంటి ప్రచురణలు దోహదపడతాయని పేర్కొన్నారు.
ఇతర పుస్తకాలు కూడా అందజేత
కార్యక్రమంలో సురవరం ప్రతాపరెడ్డి తెలుగు విశ్వవిద్యాలయం సీనియర్ ఫ్యాకల్టీ, రచయిత్రి డాక్టర్ షేక్ హసీనా రచించిన పలు పుస్తకాలను కూడా మంత్రి పొంగులేటి శ్రీనివాసరెడ్డికి అందజేశారు. సాహిత్య రంగంలో కొత్త రచయితలు, విద్యార్థులను ప్రోత్సహించే కార్యక్రమాలు కొనసాగాలని ఈ భేటీలో అభిప్రాయాలు వ్యక్తమయ్యాయి.
ఈ వార్తపై మీ స్పందన?
🔥 గత 24 గంటల్లో అత్యధికంగా చదివిన వార్తలు
ఇవి గత 24 గంటల్లో ఎక్కువ మంది చదివిన వార్తలు



