హైదరాబాద్, సూర్య న్యూస్ : ప్రభుత్వ హాస్టళ్లలో (Government Hostels) ఉంటూ చదువుకుంటున్న తమ పిల్లలను చూసేందుకు వచ్చే తల్లిదండ్రుల పరిస్థితి జైలులో ఖైదీలను కలిసినట్లుగా తయారైంది. తాజాగా ఒక వృద్ధురాలు ఇనుప గేటు సందులోంచి తన మనవరాలికి ఎంతో ప్రేమగా జడ వేస్తున్న దృశ్యం సోషల్ మీడియాలో (Social Media) తీవ్రంగా వైరల్ అవుతోంది. కనీసం దగ్గరకు తీసుకునే అవకాశం లేక గేటు అవతలి నుంచే తమ ప్రేమాభిమానాలను వ్యక్తపరచాల్సిన దయనీయ పరిస్థితి నెలకొనడం పట్ల సర్వత్రా ఆవేదన వ్యక్తమవుతోంది.
ములాఖత్ను తలపిస్తున్న నిబంధనలు
సాధారణంగా విద్యార్థుల భద్రత దృష్ట్యా ప్రభుత్వ హాస్టళ్లలో అధికారులు కఠిన నిబంధనలు అమలు చేస్తుంటారు. అయితే ఈ నిబంధనల వల్ల తల్లిదండ్రులు తమ పిల్లలను ఆప్యాయంగా పలకరించుకునే అవకాశం కూడా లేకుండా పోతోందనే విమర్శలు వినిపిస్తున్నాయి. అచ్చం జైలులో ఖైదీలను కలిసే ‘ములాఖత్’ తరహాలోనే కంచె బయట నుంచే పలకరించి వెనుతిరగాల్సి వస్తోందని పేరెంట్స్ ఆవేదన చెందుతున్నారు.
కనీసం సెలవు దినమైన ఆదివారమైనా పిల్లలతో ప్రశాంతంగా కాసేపు గడిపేలా హాస్టల్ యాజమాన్యాలు ప్రత్యేక ఏర్పాట్లు చేయాలని విద్యార్థుల తల్లిదండ్రులు వేడుకుంటున్నారు. భద్రత పేరుతో పిల్లలకు, కుటుంబ సభ్యులకు మధ్య ఉన్న భావోద్వేగాలను ఇలా గేట్లకు పరిమితం చేయడం సరైన పద్ధతి కాదని నెటిజన్లు సైతం ఈ వైరల్ వీడియోపై తీవ్రంగా స్పందిస్తున్నారు.
ఈ వార్తపై మీ స్పందన?
🔥 గత 24 గంటల్లో అత్యధికంగా చదివిన వార్తలు
ఇవి గత 24 గంటల్లో ఎక్కువ మంది చదివిన వార్తలు
