బీటెక్, డిప్లొమా చదివి 5 నుంచి 15 ఏళ్ల అనుభవం ఉన్నవారికి అవకాశం.. రాజమండ్రి, విశాఖలో ఇంటర్వ్యూలు
సూర్య న్యూస్ డెస్క్ : ఇంజనీరింగ్ రంగంలో అనుభవం ఉండి మంచి అవకాశం కోసం ఎదురుచూస్తున్న వారికి శుభవార్త. ప్రముఖ మౌలిక వసతుల నిర్మాణ సంస్థ ఒకటి వాటర్ సప్లై ప్రాజెక్టుల్లో (Water Supply Projects) పనిచేసేందుకు ఇంజనీర్ నుంచి మేనేజర్ స్థాయి వరకు పలు పోస్టుల భర్తీకి వాక్-ఇన్ ఇంటర్వ్యూలు నిర్వహిస్తోంది. ఎలాంటి రాత పరీక్ష లేకుండా నేరుగా ఇంటర్వ్యూకు హాజరై ఉద్యోగం పొందే అవకాశం ఉండటంతో అనుభవజ్ఞులైన అభ్యర్థులు ఈ అవకాశాన్ని సద్వినియోగం చేసుకోవాలని సంస్థ కోరింది.
మేఘా ఇంజనీరింగ్ అండ్ ఇన్‌ఫ్రాస్ట్రక్చర్స్ లిమిటెడ్ (MEIL) ఆంధ్రప్రదేశ్‌లోని కాకినాడ, నర్సీపట్నం ప్రాంతాల్లో చేపడుతున్న వాటర్ సప్లై ప్రాజెక్టుల కోసం ఈ నియామకాలు చేపడుతోంది. సివిల్, పైప్‌లైన్ వర్క్స్, ప్లానింగ్, క్వాలిటీ కంట్రోల్ తదితర విభాగాల్లో అనుభవం ఉన్న పురుష అభ్యర్థులు మాత్రమే ఈ ఇంటర్వ్యూలకు హాజరు కావాలని సంస్థ ఒక ప్రకటనలో తెలిపింది. బీటెక్ లేదా డిప్లొమా (సివిల్ లేదా మెకానికల్) పూర్తి చేసి, వాటర్ సప్లై ప్రాజెక్టుల్లో 5 నుంచి 15 ఏళ్ల అనుభవం ఉన్నవారు ఈ పోస్టులకు అర్హులు. తొలి విడత ఇంటర్వ్యూలను నవంబర్ 13న రాజమండ్రి హుకుంపేట రోడ్డులోని హోటల్ జురాలో, రెండో విడత ఇంటర్వ్యూలను నవంబర్ 14న విశాఖపట్నం అసిల్‌మెట్ట జంక్షన్‌లోని మేఘాలయ హోటల్‌లో ఉదయం 10 గంటల నుంచి మధ్యాహ్నం ఒంటిగంట వరకు నిర్వహించనున్నారు.
ఇంటర్వ్యూకు హాజరయ్యే అభ్యర్థులు తప్పనిసరిగా తమ రెజ్యూమేతో పాటు ప్రస్తుత కంపెనీ అపాయింట్‌మెంట్, ఇంక్రిమెంట్ లెటర్లు, గత మూడు నెలల శాలరీ స్లిప్పులు, ఆరు నెలల బ్యాంక్ స్టేట్‌మెంట్, విద్యార్హత ధృవీకరణ పత్రాలు, గతంలో పనిచేసిన కంపెనీల ఎక్స్‌పీరియన్స్ లెటర్లు, ఆధార్, పాన్ కార్డుల జిరాక్స్ కాపీలు తీసుకురావాలని సంస్థ సూచించింది. ఆసక్తి గల అభ్యర్థులు తమ రెజ్యూమేను wsphr@meghaeng.com ఈమెయిల్‌కు పంపి దరఖాస్తు చేసుకోవచ్చు. మరిన్ని వివరాల కోసం కూడా ఇదే ఈమెయిల్ ద్వారా సంస్థను సంప్రదించవచ్చు.
ఈ వార్తపై మీ స్పందన?
🔥 గత 24 గంటల్లో అత్యధికంగా చదివిన వార్తలు
ఇవి గత 24 గంటల్లో ఎక్కువ మంది చదివిన వార్తలు
