భువనగిరి, సూర్య న్యూస్ : రాష్ట్రంలో గీత కార్మికులకు ఉపాధి కల్పించాలనే ఉద్దేశంతో ఏర్పాటు చేసిన నీరా ప్రాజెక్టు (Neera Project) పట్ల ప్రభుత్వం తీవ్ర నిర్లక్ష్యం వహిస్తోందని తెలంగాణ గౌడ సంక్షేమ సంఘం గ్రేటర్ హైదరాబాద్ అధ్యక్షుడు సురేష్ గౌడ్ మండిపడ్డారు. యాదాద్రి భువనగిరి జిల్లా నందనంలో కోట్లు వెచ్చించి ఏర్పాటు చేసిన ప్లాంట్‌లోని యంత్రాలు వినియోగంలోకి రాకముందే నిరుపయోగంగా పడి తుప్పుపడుతున్నాయని ఆయన తీవ్ర ఆవేదన వ్యక్తం చేశారు.
గౌడ జాతి అభివృద్ధి, ఉపాధి కల్పన కోసం ఏర్పాటు చేసిన ఈ కేంద్రాలు పాలకుల నిర్లక్ష్యంతో పూర్తిగా నిర్వీర్యం అయ్యే దిశగా వెళ్తున్నాయని సురేష్ గౌడ్ ఆరోపించారు. ప్రభుత్వం తక్షణమే స్పందించి మూలనపడి తుప్పు పడుతున్న యంత్రాలను తిరిగి వినియోగంలోకి తీసుకురావాలని డిమాండ్ చేశారు. కొత్త నీరా పాలసీని వెంటనే అమలు చేసి, గీత వృత్తిదారులకు ఉపాధి మార్గం చూపేలా తగిన చర్యలు తీసుకోవాలని ప్రభుత్వాన్ని కోరారు.
ఏళ్ల తరబడి వృథాగానే..
నందనం గ్రామంలో తాటి ఉత్పత్తుల కేంద్రంలో నీరా ప్లాంట్ ఏర్పాటు కోసం గత బీఆర్ఎస్ ప్రభుత్వం 2022లో రూ.8 కోట్లతో నిర్మాణం చేపట్టి యంత్రాలను బిగించింది. కానీ, దానిని ప్రారంభించకపోవడంతో ఆ యంత్రాలన్నీ అక్కడే తుప్పుపడుతున్నాయి. ఆ తర్వాత వచ్చిన కాంగ్రెస్ ప్రభుత్వం నీరాను హెల్త్ డ్రింక్‌గా మార్చి స్టార్ హోటళ్లకు లింక్ చేస్తామని, కొత్త విధానాలు తీసుకొస్తామని ప్రకటించినా ఆచరణలో మాత్రం అడుగులు ముందుకు పడలేదు.
అట్టహాసంగా శంకుస్థాపన.. ఆపై మౌనం
2022 జూలై 29న అప్పటి ఎక్సైజ్ శాఖ మంత్రి శ్రీనివాస్ గౌడ్ ఈ ప్లాంట్‌కు అట్టహాసంగా శంకుస్థాపన చేశారు. ప్రభుత్వ విప్ గొంగిడి సునీత, అప్పటి భువనగిరి ఎమ్మెల్యే పైళ్ల శేఖర్ రెడ్డి, అప్పటి కలెక్టర్ పమేలా సత్పతి తదితరులు ఈ కార్యక్రమంలో పాల్గొన్నారు. నాలుగు ఎకరాల విస్తీర్ణంలో రోజుకు సుమారు 2 వేల లీటర్ల నీరాను సేకరించి, పాల తరహాలో పాశ్చరైజ్ చేసి, ప్యాకింగ్ చేసి హైదరాబాద్‌లోని నీరా కేఫ్‌తో పాటు ఇతర ప్రాంతాలకు సరఫరా చేయాలన్నది లక్ష్యం. నీరాతో పాటు తాటి బెల్లం, చక్కెర, చాక్లెట్లు, తేనె వంటి ఉప ఉత్పత్తులను కూడా తయారు చేయాలని ప్రణాళికలు రూపొందించారు. ఐదారు నెలల్లో ప్లాంట్ అందుబాటులోకి వస్తుందని అప్పట్లో ప్రకటించారు. భవనాల నిర్మాణం పూర్తయి యంత్రాలను బిగించినా, ఆ తర్వాత ఎన్నికల కోడ్, ప్రభుత్వ మార్పుతో ప్రారంభోత్సవానికి నోచుకోలేదు.
కొత్త పాలసీ అమలు ఎప్పుడు?
రాష్ట్రవ్యాప్తంగా నందనంతో పాటు రంగారెడ్డి జిల్లా ముద్విన్, సంగారెడ్డి జిల్లా మునిపల్లి, నల్గొండ జిల్లా సర్వేల్ తదితర ప్రాంతాల్లో నీరా సేకరణ కేంద్రాలు ఏర్పాటు చేయాలని గతంలో ప్రణాళికలు రూపొందించారు. అయితే, ఎక్కడా ఇవి పూర్తిస్థాయిలో అందుబాటులోకి రాలేదు. ఇప్పటికైనా ప్రభుత్వం నీరా నూతన పాలసీని ఎప్పుడు అమలు చేస్తుందో స్పష్టం చేయాలని, గీత కార్మికుల సంక్షేమాన్ని దృష్టిలో ఉంచుకుని ఈ ప్రాజెక్టును వెంటనే పునరుద్ధరించాలని గౌడ సంఘం నాయకులు కోరుతున్నారు.
విశేషమేమిటంటే, ఇదే స్థలంలో 1993లో అప్పటి మంత్రులు ప్రారంభించిన తాటి ఉత్పత్తుల కేంద్రం కూడా కొంతకాలానికే మూతపడింది. ఇప్పుడు కొత్తగా ఏర్పాటు చేసిన నీరా ప్లాంట్ కూడా అదే బాటలో నడుస్తోందని స్థానిక గీత కార్మికులు ఆవేదన వ్యక్తం చేస్తున్నారు. ప్లాంట్ ప్రారంభానికి సంబంధించి ప్రభుత్వానికి నివేదికలు పంపామని, అనుమతులు రాగానే ప్రారంభిస్తామని ఎక్సైజ్ అధికారులు చెబుతున్నారు.
ఈ వార్తపై మీ స్పందన?
🔥 గత 24 గంటల్లో అత్యధికంగా చదివిన వార్తలు
ఇవి గత 24 గంటల్లో ఎక్కువ మంది చదివిన వార్తలు
