|  
● FLASH NEWS
Canada: కెనడాలో ఇద్దరి కాల్చివేత.. వెలుగులోకి సంచలన విషయాలు!  •  Health: రాప్తాడు బాలిక ఆరోగ్యంపై తీపి కబురు.. త్వరలోనే ఇంటికి!  •  Drugs: డ్రగ్స్ ముఠాలకు హైదరాబాద్ సీపీ హెచ్చరిక.. ఇక ఆస్తులపైనే గురి!  •  Congress: సంక్షేమ పథకాల పేరుతో ప్రజలను మోసం చేస్తున్నారు.. కేపీ వివేకానంద్ ఫైర్  •  Trump: ఇరాన్‌పై దాడులకు తొందరపడొద్దన్న ట్రంప్  •  BRS: సిద్దిపేట సభ అట్టర్ ఫ్లాప్.. రేవంత్‌పై గట్టు రాంచందర్ రావు ఫైర్  • 
Skip to content

ఆస్ట్రేలియన్ ఓపెన్ స్క్వాష్ 2026 ఛాంపియన్‌గా మలేషియా సంచలనం సివసంగరి సుబ్రమణ్యం

మలేషియా స్క్వాష్ స్టార్, ప్రపంచ 6వ ర్యాంకర్ ఎస్. సివసంగరి (Sivasangari Subramaniam) అంతర్జాతీయ వేదికపై మరోసారి తన ఆధిపత్యాన్ని చాటుకుంది. బ్రిస్బేన్‌లోని సౌత్ బ్యాంక్ పియాజా వేదికగా జరిగిన ప్రతిష్టాత్మక ఆస్ట్రేలియన్ ఓపెన్ 2026 (PSA గోల్డ్ లెవల్) టోర్నమెంట్‌లో సివసంగరి ఛాంపియన్‌గా అవతరించింది. ఆదివారం జరిగిన ఫైనల్ పోరులో అద్భుత ప్రదర్శన కనబరిచిన ఆమె, తన కెరీర్‌లో 16వ PSA టైటిల్‌ను కైవసం చేసుకుంది.

ఏకపక్షంగా సాగిన ఫైనల్ పోరు

​అమెరికాకు చెందిన మారినా స్టెఫానోనీతో జరిగిన ఫైనల్ మ్యాచ్‌లో సివసంగరి పూర్తి ఆధిపత్యం ప్రదర్శించింది. కేవలం 28 నిమిషాల్లోనే 3-0 (11-7, 11-4, 11-8) తేడాతో ప్రత్యర్థిని చిత్తు చేసింది. ఆరంభం నుండే వేగవంతమైన షాట్లు, పకడ్బందీ డిఫెన్స్‌తో మారినాకు ఏమాత్రం అవకాశం ఇవ్వకుండా మ్యాచ్‌ను ముగించింది. 13 నెలల సుదీర్ఘ నిరీక్షణ తర్వాత సివసంగరి సాధించిన మొదటి టైటిల్ ఇది. అంతకుముందు జరిగిన సెమీఫైనల్‌లో బెల్జియంకు చెందిన బలమైన క్రీడాకారిణి నెలె గిలిస్‌ను 11-8, 13-11, 11-4 స్కోరుతో ఓడించి ఫైనల్‌లో అడుగుపెట్టింది.

మలేషియా గర్వించదగ్గ క్రీడాకారిణి​

మలేషియాలోని కేడా రాష్ట్రానికి చెందిన సివసంగరి, గతంలో అమెరికాలోని కార్నెల్ యూనివర్శిటీలో విద్యనభ్యసించినప్పటికీ, అంతర్జాతీయ వేదికలపై మలేషియా తరపున తన ప్రతిభను చాటుతోంది. లండన్ క్లాసిక్ వంటి ప్రతిష్టాత్మక టోర్నీల్లోనూ విజేతగా నిలిచిన ఆమె, ప్రస్తుతం ప్రపంచ ర్యాంకింగ్స్‌లో టాప్-6లో కొనసాగుతోంది. ఈ విజయం పట్ల సివసంగరి సోషల్ మీడియా వేదికగా స్పందిస్తూ తన కుటుంబం, టీమ్ మరియు స్పాన్సర్లు అందించిన మద్దతు వల్లే ఈ ఘనత సాధ్యమైందని పేర్కొంది. బ్రిస్బేన్‌లోని అభిమానుల మద్దతు మరియు అక్కడి వాతావరణం మరువలేనిదని ఆమె వివరించింది. కొసమెరుపు ఏంటంటే, శివసంగరి కుటుంబం భారత సంతతికి చెందినది కావడం. మలేషియాలో జన్మించినా, భారతీయ మూలాలతో ఆమె ఈ విజయాన్ని సాధించడం భారత క్రీడా ప్రేమికులకు మరింత ఆనందాన్నిచ్చే విషయం.

ఈ వార్తపై మీ స్పందన?

🔥 గత 24 గంటల్లో అత్యధికంగా చదివిన వార్తలు

ఇవి గత 24 గంటల్లో ఎక్కువ మంది చదివిన వార్తలు