శ్రీహరికోట, సూర్య న్యూస్ : భారత అంతరిక్ష పరిశోధన సంస్థ (ISRO) మరో భారీ విజయాన్ని తన ఖాతాలో వేసుకుంది. స్మాల్ శాటిలైట్ లాంచ్ వెహికల్ (SSLV-D3) రాకెట్ ప్రయోగం విజయవంతమైంది. ఈ రాకెట్ ద్వారా ఎర్త్ అబ్జర్వేషన్ శాటిలైట్-08 (EOS-08) తో పాటు మరో చిన్న ఉపగ్రహం ఎస్సార్-0 డిమోశాట్ను ఇస్రో విజయవంతంగా కక్ష్యలోకి ప్రవేశపెట్టింది. స్వాతంత్ర్య దినోత్సవం సందర్భంగా బుధవారం ఉదయం 9.17 గంటలకు ఆంధ్రప్రదేశ్లోని శ్రీహరికోట సతీష్ ధావన్ అంతరిక్ష కేంద్రం మొదటి ప్రయోగ వేదిక నుంచి ఈ రాకెట్ నింగిలోకి దూసుకెళ్లింది.
నిర్దేశిత కక్ష్యలోకి ఉపగ్రహాలు
ప్రయోగం జరిగిన 13 నిమిషాల వ్యవధిలోనే ఎస్ఎస్ఎల్వీ-డీ3 రాకెట్.. 175.5 కిలోల బరువున్న ఈఓఎస్-08 (EOS-08) ఉపగ్రహాన్ని భూమికి 475 కిలోమీటర్ల ఎత్తులోని వృత్తాకార కక్ష్యలో ప్రవేశపెట్టింది. ఆ తర్వాత కొద్ది నిమిషాలకే 0.2 కేజీల బరువున్న ఎస్సార్-0 డిమోశాట్ను కూడా విజయవంతంగా కక్ష్యలోకి చేర్చింది. 34 మీటర్ల ఎత్తు, 2 మీటర్ల వ్యాసంతో ఉన్న ఈ ఎస్ఎస్ఎల్వీ రాకెట్ను చిన్న ఉపగ్రహాలను కక్ష్యలోకి ప్రవేశపెట్టేందుకు ప్రత్యేకంగా రూపొందించారు.
ఈఓఎస్-08 ఉపగ్రహం ఉపయోగాలు
ఈఓఎస్-08 ఉపగ్రహం విపత్తు నిర్వహణ, పర్యావరణ పరిరక్షణతో పాటు అనేక రంగాల్లో కీలక పాత్ర పోషించనుంది. దీని జీవితకాలం ఏడాది పాటు ఉంటుందని ఇస్రో వెల్లడించింది. ఇందులో అమర్చిన ఎలక్ట్రో ఆప్టికల్ ఇన్ఫ్రారెడ్ పేలోడ్ (EOIR) ద్వారా పగలు, రాత్రి సమయాల్లో స్పష్టమైన చిత్రాలను తీయవచ్చు. అగ్ని ప్రమాదాలు, అగ్నిపర్వతాల పేలుళ్లు, వరదలు వంటి విపత్తులను పర్యవేక్షించడంలో ఇది సహాయపడుతుంది.
అలాగే, గ్లోబల్ నావిగేషన్ శాటిలైట్ సిస్టమ్ రిఫ్లెక్టోమెట్రీ (GNSS-R) పేలోడ్ ద్వారా సముద్ర ఉపరితల గాలులు, నేల తేమ, వాతావరణ మార్పులను అంచనా వేయవచ్చు. మరో పేలోడ్ ఎస్ఐసీ-యూవీ డోసిమీటర్ (SiC UV Dosimeter) ద్వారా గగన్యాన్ మిషన్ కోసం అతినీలలోహిత (UV) వికిరణాన్ని కొలవవచ్చని ఇస్రో అధికారులు వివరించారు. ఎస్ఎస్ఎల్వీ-డీ3 ప్రయోగం విజయవంతం కావడం పట్ల ఇస్రో చైర్మన్ ఎస్. సోమనాథ్ శాస్త్రవేత్తల బృందాన్ని అభినందించారు.
🔥 గత 24 గంటల్లో అత్యధికంగా చదివిన వార్తలు
ఇవి గత 24 గంటల్లో ఎక్కువ మంది చదివిన వార్తలు
