హైదరాబాద్, సూర్య న్యూస్: తెలంగాణ విద్యా వర్గాల్లో భారీ సంచలనం చోటుచేసుకుంది. రాష్ట్ర విద్యా కమిషన్ చైర్మన్ (Telangana Education Commission Chairperson), రిటైర్డ్ ఐఏఎస్ అధికారి ఆకునూరి మురళి (Akunuri Murali, IAS Retd) తన పదవికి ఆకస్మికంగా రాజీనామా చేశారు. ఈ మేరకు ఆయన తన రాజీనామా లేఖను రాష్ట్ర ప్రభుత్వ ప్రధాన కార్యదర్శి (Chief Secretary K Ramakrishna Rao) కి పంపించారు. రాష్ట్రంలో విద్యా వ్యవస్థ బలోపేతం, సమూల సంస్కరణల కోసం రేవంత్ రెడ్డి నేతృత్వంలోని కాంగ్రెస్ ప్రభుత్వం ఈ విద్యా కమిషన్ను ఏర్పాటు చేసి, దానికి చైర్మన్గా ఆకునూరి మురళిని నియమించిన సంగతి తెలిసిందే. అయితే, ఆయన పదవీ కాలం ముగియడానికి ఇంకా నాలుగు నెలల సమయం ఉండగానే, ముందే ఈ పదవి నుంచి తప్పుకోవడం ఇప్పుడు రాజకీయ, విద్యా వర్గాల్లో తీవ్ర చర్చనీయాంశంగా మారింది.
రాజీనామా లేఖలో ఏముందంటే?
తన రాజీనామాకు గల కారణాన్ని ఆకునూరి మురళి సీఎస్కు పంపిన లేఖలో స్పష్టం చేశారు. ప్రభుత్వం విద్యా కమిషన్ చైర్మన్గా తనకు అప్పగించిన బాధ్యతలను, పనిని విజయవంతంగా పూర్తి చేశానని అందులో పేర్కొన్నారు. రాష్ట్రంలో ప్రభుత్వ పాఠశాలలు, విద్యా ప్రమాణాల మెరుగుదలపై క్షుణ్ణంగా అధ్యయనం చేసి, సిఫార్సులతో కూడిన సమగ్ర నివేదికను (Comprehensive Report) ఇప్పటికే ప్రభుత్వానికి సమర్పించినట్లు వివరించారు. బాధ్యత నెరవేరినందున సంతోషంగా పదవి నుంచి తప్పుకుంటున్నట్లు ప్రకటించారు. తనకు ఈ అవకాశం కల్పించినందుకు గాను తెలంగాణ ప్రభుత్వానికి ఆయన ప్రత్యేక కృతజ్ఞతలు తెలిపారు. ఈ రాజీనామా ప్రతిని సీఎం కార్యదర్శి అజిత్ రెడ్డికి కూడా సమాచారం కోసం పంపారు.
పదవీ కాలం ఉండగానే ఎందుకు తప్పుకున్నారు?
ఆకునూరి మురళి తన విధి నిర్వహణ పూర్తయిందని లేఖలో ప్రకటించినప్పటికీ, విద్యా వర్గాల్లో మాత్రం వేరే చర్చ నడుస్తోంది. ఇటీవల విద్యా కమిషన్ ప్రభుత్వానికి సమర్పించిన నివేదికలోని కొన్ని విప్లవాత్మక సిఫార్సులు తీవ్ర వివాదానికి దారితీశాయి. ముఖ్యంగా ప్రభుత్వ ఉపాధ్యాయుల వేతనాలు మార్కెట్ ప్రమాణాల కంటే ఎక్కువగా ఉన్నాయని చేసిన వ్యాఖ్యలపై ఉపాధ్యాయ సంఘాలు భగ్గుమన్నాయి. అలాగే ఇంటర్మీడియట్ బోర్డును రద్దు చేసి పాఠశాల విద్యలో విలీనం చేయాలనే ఆలోచనలపై, ప్రైవేట్ స్కూళ్ల ఫీజుల నియంత్రణకు చట్టం తేవాలనే ప్రతిపాదనలపై ప్రతిపక్షాలు, ఉపాధ్యాయ లోకం నుండి తీవ్ర వ్యతిరేకత వ్యక్తమైంది. ఈ నేపథ్యంలో తలెత్తిన తీవ్ర ఒత్తిళ్లు, సిఫార్సుల అమలుపై ప్రభుత్వ వైఖరి కారణంగానే ఆయన పదవీ కాలం ముగియకుండానే తప్పుకున్నారా అనే కోణంలో విశ్లేషణలు మొదలయ్యాయి.
విద్యా కమిషన్ కు చైర్మన్ తో పాటు సభ్యులు కూడా ఉంటారు కదా. తనతో పాటు సభ్యుల అభిప్రాయాలను పత్రికా ముఖంగా చెప్పాల్సి వుండే.