అమరావతి, సూర్య న్యూస్ : ఆంధ్రప్రదేశ్ రాజకీయాల్లో (AP Politics) వైఎస్ఆర్సీపీ అధినేత వైఎస్ జగన్ మోహన్ రెడ్డి చేసిన ‘జగన్ 2.0’ వ్యాఖ్యలు తీవ్ర దుమారం రేపుతున్నాయి. ఈ వ్యాఖ్యలపై జనసేన అధినేత, డిప్యూటీ సీఎం పవన్ కల్యాణ్ (Pawan Kalyan) ఘాటుగా స్పందించారు. జగన్ 2.0కు ఎన్డీయే ప్రభుత్వం పది రెట్లు సమాధానం చూపిస్తుందని ఆయన తీవ్రస్థాయిలో హెచ్చరించారు.
పులివెందులలో జగన్ కామెంట్స్
ఇటీవల పులివెందుల పర్యటనలో ఉన్న జగన్.. కార్యకర్తలను ఉద్దేశించి కీలక వ్యాఖ్యలు చేశారు. వచ్చే ఏడాది సెప్టెంబర్‌లో తాను పాదయాత్ర ప్రారంభిస్తానని, ఆ తర్వాత కూటమి ప్రభుత్వం తుడిచిపెట్టుకుపోతుందని వ్యాఖ్యానించారు. రెండేళ్ల తర్వాత వచ్చేది ‘జగన్ 2.0’ అని, అందులో తాను 1 అయితే కార్యకర్త 2 అని ఆయన ధీమా వ్యక్తం చేశారు. పులివెందులలో కొడితే రాష్ట్రం మొత్తం సౌండ్ వినిపించాలని, కూటమి పార్టీల దౌర్జన్యాలను ధైర్యంగా ఎదుర్కోవాలని పిలుపునిచ్చారు.
పది రెట్లు చూపిస్తామన్న పవన్
జగన్ చేసిన ఈ వ్యాఖ్యలకు పవన్ కల్యాణ్ స్ట్రాంగ్ కౌంటర్ ఇచ్చారు. గతంలో 1.0 చూపిస్తేనే ఎదుర్కొని ఎలా నిలబడ్డామో అందరికీ తెలుసని గుర్తుచేశారు. వాళ్లు అలాంటి హింసాత్మక విధానాలు చూపిస్తే, ప్రజలకు రక్షణ కవచంగా ఎలా ఉండాలో తమకు తెలుసని స్పష్టం చేశారు. ‘బలహీనుడు బెదిరిస్తాడు.. బలవంతుడు ఎప్పుడూ బెదిరించడు’ అంటూ పవన్ ఘాటు వ్యాఖ్యలు చేశారు.
చంద్రబాబు సెటైర్లు
మరోవైపు ముఖ్యమంత్రి చంద్రబాబు నాయుడు సైతం జగన్ వ్యాఖ్యలపై స్పందిస్తూ సెటైర్లు వేశారు. అసలు ‘జగన్ 2.0’ అంటే అందరినీ లేపేస్తారేమో అంటూ ఆయన ఎద్దేవా చేశారు. మొత్తానికి జగన్ పులివెందుల పర్యటనలో చేసిన వ్యాఖ్యలు ఏపీలో అధికార, ప్రతిపక్షాల మధ్య సరికొత్త రాజకీయ రగడకు దారితీశాయి.
ఈ వార్తపై మీ స్పందన?
🔥 గత 24 గంటల్లో అత్యధికంగా చదివిన వార్తలు
ఇవి గత 24 గంటల్లో ఎక్కువ మంది చదివిన వార్తలు
