సుభాష్ చంద్ర వ్యక్తిగత దివాలా కేసులో NCLT ఐదుగురు సభ్యుల ప్రత్యేక బెంచ్ కీలక ఆదేశాలు జారీ చేసింది. ఆగస్టు 25న ఇచ్చిన తీర్పును నిలిపివేస్తూ, ఆయన ఆస్తుల విక్రయంపై ఆంక్షలు విధించింది.

న్యూఢిల్లీ, సూర్య న్యూస్: ప్రముఖ మీడియా సంస్థ జీ గ్రూప్ (Zee Group) అధినేత సుభాష్ చంద్రకు (Subhash Chandra) నేషనల్ కంపెనీ లా ట్రిబ్యునల్ (NCLT) నుంచి భారీ ఎదురుదెబ్బ తగిలింది. ఆయన వ్యక్తిగత దివాలా (Personal Insolvency) కేసులో ఆగస్టు 25న వెలువడిన తీర్పుపై ఐదుగురు సభ్యుల ప్రత్యేక ధర్మాసనం స్టే విధించింది. గతంలో చిన్న బెంచ్ ఇచ్చిన తీర్పులో స్పష్టమైన మెజారిటీ అభిప్రాయం రాకపోవడంతో ఈ వివాదంపై తాజాగా మరోసారి విచారణ జరపాలని ట్రిబ్యునల్ నిర్ణయించింది. ఈ మేరకు కేసుతో సంబంధం ఉన్న అన్ని పార్టీలకు నోటీసులు జారీ చేసింది.

జస్టిస్ అనుపిందర్ సింగ్ గ్రెవాల్ నేతృత్వంలో ఏర్పాటైన ఐదుగురు సభ్యుల బెంచ్ ఈ కేసును విచారించింది. పాత తీర్పును నిలిపివేయడంతో పాటు సుభాష్ చంద్ర ప్రత్యక్షంగా లేదా పరోక్షంగా ఎలాంటి ఆస్తులను విక్రయించకుండా మరియు ఇతరులకు బదిలీ చేయకుండా ఆంక్షలు విధిస్తూ ఆదేశాలు జారీ చేసింది. ప్రస్తుతానికి ఈ స్టే ఉత్తర్వులు ఆయనకు పెద్ద ఇబ్బందికర పరిణామంగా మారాయని తెలుస్తోంది.

వివాదానికి కారణమైన రీపేమెంట్ ప్లాన్

ఇండియాబుల్స్ హౌసింగ్ ఫైనాన్స్ సంస్థ దివాలా స్మృతి సెక్షన్ 95 కింద సుభాష్ చంద్రపై వ్యక్తిగత దివాలా ప్రొసీడింగ్స్ ప్రారంభించింది. దీనికి బదులుగా ఆయన ఒక రీపేమెంట్ ప్లాన్‌ను ప్రతిపాదించారు. అప్పట్లో ఆమోదించిన రూ. 22 వేల కోట్ల క్లెయిమ్‌లకు బదులుగా కేవలం రూ. 6 కోట్ల 25 లక్షలు మాత్రమే చెల్లిస్తానని ఆయన పేర్కొనడం వివాదాస్పదంగా మారింది. అలాగే దివాలా ప్రక్రియ ఖర్చుల కోసం మరో రూ. 25 లక్షలు కేటాయించారు. అసలు చెల్లించాల్సిన అప్పుకు, ఈ మొత్తానికి భారీ వ్యత్యాసం ఉండటంతో ఈ ప్లాన్ విమర్శలపాలైంది.

ఈ ప్రణాళికను మొదట విచారించిన ట్రిబ్యునల్ బెంచ్‌లోని సభ్యులు వేర్వేరు అభిప్రాయాలను వ్యక్తం చేశారు. రిజల్యూషన్ ప్రొఫెషనల్ అనుసరించిన విధానంలో తీవ్ర లోపాలు ఉన్నాయని ఒక సభ్యురాలు ప్లాన్‌ను పూర్తిగా తిరస్కరించారు. ఈ విభేదాల కారణంగా కేసు బదిలీ కాగా ఆగస్టు 25న మూడో సభ్యుడు ప్లాన్‌ను ఆమోదించినప్పటికీ మెజారిటీ అభిప్రాయం రాలేదని ఆగస్టు 31న తేల్చారు. ఈ నేపథ్యంతోనే తాజా ప్రత్యేక బెంచ్ ఏర్పాటైంది.

గ్యారెంటర్‌గా ఉండటమే నా తప్పు

ఈ పరిణామాలపై సుభాష్ చంద్ర స్పందిస్తూ తాను వ్యక్తిగతంగా ఎలాంటి రుణాలు తీసుకోలేదని స్పష్టం చేశారు. కేవలం గ్యారెంటర్‌గా ఉండటమే తాను చేసిన అతిపెద్ద తప్పు అంటూ ఆయన కామెంట్ చేశారు. ఇదే క్రమంలో జీ మీడియా సంస్థకు తాను ఉచితంగానే సేవలు అందిస్తున్నానని, దానికి ఎలాంటి వేతనం పొందడం లేదని ఆయన చెప్పుకొచ్చారు.

పేజీల కొద్దీ వార్తలు చదివే తీరిక లేదా?

అసలు విషయం ఏంటో 3 లైన్లలో ఫాస్ట్‌గా తెలుసుకోవాలంటే..

ఇప్పుడే మా WhatsApp ఛానల్‌లో జాయిన్ అవ్వండి! 🎯

Join