Nirjala Ekadashi 2026 : నిర్జల ఏకాదశి వ్రతం.. ఈ ఒక్క ఉపవాసంతో 24 ఏకాదశుల పుణ్యఫలం! పూర్తి వివరాలు..

హైదరాబాద్, సూర్య న్యూస్ :హిందూ మతంలో ఏకాదశి (Ekadashi) తిథికి ఎంతో విశిష్టత ఉంది. అందులోనూ జ్యేష్ఠ మాసంలోని శుక్ల పక్షంలో వచ్చే ఏకాదశిని నిర్జల ఏకాదశి (Nirjala Ekadashi) అని భక్తిశ్రద్ధలతో పిలుస్తారు. ఈ పవిత్రమైన రోజున శ్రీ లక్ష్మీనారాయణులను పూజించి, కఠిన ఉపవాస దీక్షను పాటిస్తారు. ఈ ఉపవాసం ఆచరించడం చాలా కష్టంగా ఉన్నప్పటికీ, దీని ద్వారా అతి త్వరగా శుభ ఫలితాలు లభిస్తాయని వేద పండితులు చెబుతున్నారు.

​మహాభారత (Mahabharata) కాలంలో సాక్షాత్తూ వేదవ్యాసుడు ఈ నిర్జల ఏకాదశి వ్రతం గురించి విశదీకరించారు. ఈ ఒక్క వ్రతాన్ని ఆచరించడం ద్వారా ఏకంగా 24 ఏకాదశుల ఉపవాస ఫలితం దక్కుతుందని పురాణాలు స్పష్టం చేస్తున్నాయి. ఈ ఏకాదశి రోజున కనీసం మంచినీరు కూడా తాగకుండా (Fasting) నిష్టగా ఉండాలి. అందుకే దీనిని నిర్జల ఏకాదశి అని అంటారు. నీరు కూడా తీసుకోకుండా చేసే ఈ కఠిన ఉపవాసం వల్ల భక్తులకు శ్రీహరి విశేష ఆశీస్సులు, లక్ష్మీదేవి అనుగ్రహం కలుగుతాయి. తద్వారా ఇంట్లో సిరిసంపదలు వృద్ధి చెందుతాయి.

ఈ సంవత్సరం నిర్జల ఏకాదశి తేదీలు (Dates) ఒకసారి పరిశీలిద్దాం. జూన్ 24 సాయంత్రం 6.12 గంటలకు ఏకాదశి తిథి ప్రారంభం అవుతుంది. తిరిగి జూన్ 25 రాత్రి 8.09 గంటలకు ముగుస్తుంది. అయితే హిందూ సంప్రదాయంలో ఉదయ తిథి మరియు బ్రహ్మ ముహూర్తం ఆధారంగా పండుగలను లెక్కిస్తారు. కాబట్టి ఈ ఏడాది నిర్జల ఏకాదశి వ్రతాన్ని జూన్ 25న (June 25) అత్యంత భక్తిశ్రద్ధలతో జరుపుకుంటారు.​

నిర్జల ఏకాదశి రోజున భక్తులు తెల్లవారుజామునే నిద్రలేచి స్నానం ఆచరించాలి. విష్ణుమూర్తి (Lord Vishnu) పటాన్ని లేదా ప్రతిమను పూలు, తులసి మాలలతో అందంగా అలంకరించాలి. స్వామివారికి పండ్లు, పూలు సమర్పించి నెయ్యి దీపం వెలిగించాలి. ఆ తర్వాత తులసి మొక్కకు పూజ చేసి, చుట్టూ ఐదు లేదా ఏడు సార్లు ప్రదక్షిణలు చేయాలి. రోజంతా ‘ఓం నమో భగవతే వాసుదేవాయ’ (Om Namo Bhagavate Vasudevaya) అనే మంత్రాన్ని జపిస్తూ స్వామిని స్మరించుకోవాలి. రాత్రి పూట నిద్రపోకుండా జాగరణ చేస్తూ విష్ణుమూర్తి భజనలు, కీర్తనలు చేయాలి. మరుసటి రోజు బ్రహ్మ ముహూర్తంలో స్నానం చేసి, పూజలు ముగించుకున్న తర్వాతే అన్నం తిని ఉపవాసాన్ని విరమించాలి. అనారోగ్యంతో ఉన్నవారు మాత్రం కఠిన ఉపవాసం కాకుండా నీటితో పాటు పండ్లు తీసుకోవచ్చని శాస్త్రాలు సూచిస్తున్నాయి.

గమనిక (Disclaimer): పైన అందించిన సమాచారం పండితుల సూచనలు, ఇంటర్నెట్ లోని పురాణ కథనాల ఆధారంగా కేవలం పాఠకుల అవగాహన కోసం మాత్రమే ఇవ్వబడింది. ఈ ఆధ్యాత్మిక విషయాలను ఆచరించే ముందు సంబంధిత నిపుణులను సంప్రదించడం ఉత్తమం.