హైదరాబాద్, సూర్య న్యూస్ : భారత క్రికెట్ (Indian Cricket) చరిత్రలో ఎవరూ ఊహించని అద్భుతం జరిగింది. దశాబ్దాలుగా చెక్కుచెదరని మాస్టర్ బ్లాస్టర్ సచిన్ టెండూల్కర్ (Sachin Tendulkar) రికార్డును ఒక 15 ఏళ్ల కుర్రాడు బద్దలు కొట్టాడు. ఆ యువ సంచలనం పేరే వైభవ్ సూర్యవంశీ (Vaibhav Sooryavanshi). ఇంగ్లాండ్ (England) గడ్డపై జరిగిన మ్యాచ్ లో ఈ అరుదైన ఘట్టం చోటు చేసుకుంది.
జూలై 4న ఓల్డ్ ట్రాఫోర్డ్ వేదికగా ఇంగ్లాండ్ తో జరిగిన రెండో టీ20 మ్యాచ్ (T20 Match) ద్వారా వైభవ్ అంతర్జాతీయ క్రికెట్ లోకి అడుగుపెట్టాడు. కేవలం 15 ఏళ్ల 99 రోజుల వయసులోనే భారత జట్టు (Team India) తరఫున ఆడిన అత్యంత పిన్న వయస్కుడిగా రికార్డు సృష్టించాడు. 1989లో సచిన్ తన 16 ఏళ్ల 205 రోజుల వయసులో అరంగేట్రం చేశాడు. ఆ తర్వాత 37 ఏళ్లకు వైభవ్ ఆ రికార్డును బ్రేక్ చేశాడు. యువ ఆటగాడు తిలక్ వర్మ చేతుల మీదుగా వైభవ్ తన అరంగేట్రపు క్యాప్ (Debut Cap) అందుకున్నాడు.
ఇక టీ20 ఫార్మాట్ లో వాషింగ్టన్ సుందర్ (18 ఏళ్ల 80 రోజులు) పేరిట ఉన్న రికార్డు కూడా కనుమరుగైంది. అలాగే మహిళల జట్టులో షఫాలీ వర్మ (15 ఏళ్ల 239 రోజులు) అరంగేట్ర రికార్డును కూడా వైభవ్ దాటేశాడు. ఎన్నో అంచనాలతో క్రీజులోకి వచ్చిన ఈ వండర్ కిడ్ (Wonder Kid) తన తొలి మ్యాచ్ లో నిరాశపరిచాడు. 10 బంతులు ఆడిన వైభవ్ కేవలం 14 పరుగులు మాత్రమే చేసి ఔట్ అయ్యాడు. డేంజరస్ బౌలర్ ఆర్చర్ బౌలింగ్ లో ఒక సిక్సర్ కొట్టాడు. టంగ్ బౌలింగ్ లో మరో సిక్సర్ కొట్టి ఆ తర్వాత స్పిన్నర్ విల్ జాక్స్ బౌలింగ్ లో స్టంపౌట్ గా వెనుదిరిగాడు.
ఈ యువ ఓపెనర్ (Young Opener) భారత జట్టులోకి రావడానికి ప్రధాన కారణం ఐపీఎల్ (IPL). ఐపీఎల్ 2025లో రాజస్థాన్ రాయల్స్ తరఫున ఆడిన వైభవ్ అద్భుతాలు చేశాడు. గుజరాత్ టైటాన్స్ పై కేవలం 35 బంతుల్లోనే సెంచరీ సాధించాడు. అలాగే ఐపీఎల్ 2026 (IPL 2026) సీజన్ లో 16 మ్యాచ్ లలో ఏకంగా 237 స్ట్రైక్ రేట్ తో 776 పరుగులు చేశాడు. ఒకే సీజన్ లో 72 సిక్సర్లు బాది క్రిస్ గేల్ (Chris Gayle) రికార్డును తుడిచిపెట్టి ఆరెంజ్ క్యాప్ సొంతం చేసుకున్నాడు.
