హైదరాబాద్, సూర్య న్యూస్: శ్రీలంక (Sri Lanka) పర్యటనకు వెళ్లే భారత అండర్-19 జట్టును (India U-19 Team) భారత క్రికెట్ నియంత్రణ మండలి (BCCI) అధికారికంగా ప్రకటించింది. ఈ పర్యటనలో ఆతిథ్య జట్టుతో భారత యువ జట్టు వన్డేలు, యూత్ టెస్ట్ మ్యాచ్లు ఆడనుంది. యష్వర్ధన్ సింగ్ చౌహాన్ కు (Yashvardhan Singh Chouhan) ఈ జట్టు కెప్టెన్గా వ్యవహరించే బాధ్యతలు దక్కాయి. ఈ జట్టులో టీమిండియా మాజీ హెడ్ కోచ్, క్రికెట్ దిగ్గజం రాహుల్ ద్రవిడ్ (Rahul Dravid) చిన్న కుమారుడు అన్వయ్ ద్రవిడ్ కు (Anvay Dravid) చోటు లభించింది.
పదహారేళ్ల అన్వయ్ ద్రవిడ్ వన్డే జట్టులో వికెట్ కీపర్ బ్యాటర్గా ఎంపికయ్యాడు. గత ఏడాది నవంబరులో స్వదేశంలో ఆఫ్ఘనిస్తాన్ జట్టుతో జరిగిన సిరీస్ లో భారత అండర్-19 ‘బి’ జట్టుకు అన్వయ్ ప్రాతినిధ్యం వహించాడు. ఆ సిరీస్ లో బెంగళూరు వేదికగా జరిగిన ఒకే ఒక మ్యాచ్ లో ఆడిన అతను తొలి బంతికే అవుట్ అయ్యాడు. అయినప్పటికీ దేశవాళీ క్రికెట్ లో (Domestic Cricket) అతను కనబరుస్తున్న ప్రతిభను గుర్తించిన సెలెక్టర్లు మళ్లీ అవకాశం కల్పించారు.
బీసీసీఐ జూనియర్ క్రికెట్ కమిటీ ఈసారి పూర్తిగా కొత్త జట్టును ఎంపిక చేసింది. గత అండర్-19 ప్రపంచకప్ (U-19 World Cup) గెలిచిన జట్టులోని ఒక్క ఆటగాడిని కూడా ఈ సిరీస్ కు తీసుకోలేదు. పూర్తిగా కొత్త ఆటగాళ్లతో భవిష్యత్తు కోసం జట్టును సన్నద్ధం చేసే దిశగా సెలెక్టర్లు అడుగులు వేస్తున్నారు. ఇందులో భాగంగా ఆల్ రౌండర్లకు పెద్దపీట వేశారు.
శ్రీలంక పర్యటనలో భాగంగా భారత జట్టు జులై 4, 6, 9 తేదీల్లో హంబన్తోట వేదికగా మూడు వన్డే మ్యాచ్లు ఆడుతుంది. ఆ తర్వాత జులై 13 నుండి 16 వరకు గాలే వేదికగా మొదటి యూత్ టెస్ట్ జరుగుతుంది. జులై 20 నుండి 23 వరకు కొలంబో వేదికగా రెండో యూత్ టెస్ట్ జరగనుంది. వన్డే మరియు మల్టీ-డే ఫార్మాట్లకు వేర్వేరు జట్లను ఎంపిక చేశారు. వన్డే జట్టులో అన్వయ్ ద్రవిడ్ కు అవకాశం రాగా, మల్టీ-డే జట్టులో మాత్రం అతనికి స్థానం దక్కలేదు.
📲 మరిన్ని తాజా వార్తలు, బ్రేకింగ్ అప్డేట్స్ మరియు వివరణాత్మక కవరేజ్ కోసం Surya News WhatsApp Channel లో చేరండి 👇
