Excellent Opportunity for Students in Indian Army – Stipend Ranging from ₹30,000 to ₹75,000 : సాంకేతికత విపరీతంగా పెరిగిపోయిన ప్రస్తుత రోజుల్లో యుద్ధ వ్యూహాలు పూర్తిగా మారిపోయాయి. శత్రువులను దీటుగా ఎదుర్కోవడంలో ఇప్పుడు సోషల్ మీడియా, డిజిటల్ ప్లాట్ఫామ్స్ కూడా ప్రధాన ఆయుధాలుగా మారాయి. ఇన్ఫర్మేషన్ వార్ఫేర్లో సైతం మనదేశం ముందుండాలనే లక్ష్యంతో భారత సైన్యం (Indian Army) యువత కోసం ఒక అద్భుతమైన ఇంటర్న్షిప్ (Internship) కార్యక్రమాన్ని ప్రకటించింది. డిగ్రీ స్థాయిలో జర్నలిజం, మాస్ కమ్యూనికేషన్ చదువుతున్న విద్యార్థులకు ఇదొక సువర్ణ అవకాశం.
ప్రధానంగా మాస్ కమ్యూనికేషన్, జర్నలిజం లాంటి కోర్సులు చదువుతున్న వారికి ఈ శిక్షణ ఎంతో ఉపయోగపడుతుంది. డిజిటల్ కంటెంట్ తయారీ నుంచి మీడియా విశ్లేషణ, సోషల్ మీడియా ప్రచార వ్యూహాల రూపకల్పన వరకు కీలక అంశాలపై ఇందులో శిక్షణ ఇస్తారు.
ఈ ఇంటర్న్షిప్ మొత్తం 75 రోజుల పాటు కొనసాగుతుంది. దీనిని రెండు దశలుగా నిర్వహిస్తారు. తొలి 15 రోజులు ఆన్లైన్ విధానంలో వర్చువల్గా (Virtual) శిక్షణ ఉంటుంది. ఆ తర్వాత 60 రోజుల పాటు ఢిల్లీలో ఆఫ్లైన్ (Offline) శిక్షణ ఇస్తారు. సోమవారం నుంచి శనివారం వరకు ప్రతి రోజు ఉదయం 9 గంటల నుంచి సాయంత్రం 5 గంటల వరకు ఈ క్లాసులు ఉంటాయి.
ఇందులో ఎంపికైన విద్యార్థులకు ఆకర్షణీయమైన స్టైపెండ్ (Stipend) కూడా అందజేస్తారు. నెలకు రూ.30 వేల చొప్పున ప్రారంభమై, ఈ 75 రోజుల ఇంటర్న్షిప్ పూర్తయ్యే నాటికి విద్యార్థులకు రూ.30 వేల నుంచి రూ.75 వేల వరకు స్టైపెండ్ లభిస్తుంది. అయితే కనీసం 75 శాతం హాజరు (Attendance) తప్పనిసరిగా ఉండాలనే నిబంధనను ఆర్మీ విధించింది. హాజరు ప్రమాణాన్ని పూర్తి చేసిన అభ్యర్థులకే పూర్తి డబ్బులు ఇస్తారు.
సైన్యం శిక్షణ కావడంతో డ్రెస్ కోడ్ (Dress Code) విషయంలో కఠిన నిబంధనలు అమలులో ఉంటాయి. జీన్స్, టీ షర్టులు లేదా ఇతర క్యాజువల్ దుస్తులు ధరించి రావడానికి అనుమతి ఉండదు. పురుషులు ఫార్మల్ ప్యాంట్, షర్ట్, ఫార్మల్ షూస్ ధరించాల్సి ఉంటుంది. మహిళా విద్యార్థులు సూట్ లేదా వెస్ట్రన్ ఫార్మల్ దుస్తులతో హాజరు కావాలి. అలాగే భద్రతా నిబంధనలు కూడా కఠినంగా ఉంటాయి. శిక్షణా కేంద్రంలోకి ల్యాప్టాప్లు, స్మార్ట్ఫోన్లు తీసుకెళ్లడానికి వీల్లేదు. ప్రవేశ ద్వారం వద్దే వాటిని జమా చేయాలి. అయితే సాధారణ కీప్యాడ్ ఫోన్ను (Keypad Phone) వెంట ఉంచుకోవడానికి అనుమతిస్తారు.
దేశవ్యాప్తంగా సంబంధిత డిగ్రీ కోర్సులు చదువుతున్న విద్యార్థులు దీనికి దరఖాస్తు చేసుకోవచ్చు. భారత సైన్యం అదనపు డైరెక్టరేట్ జనరల్ ఆఫ్ స్ట్రాటజిక్ కమ్యూనికేషన్ ఆధ్వర్యంలో ఈ కార్యక్రమం జరుగుతుంది. ఆసక్తి ఉన్న విద్యార్థులు అధికారిక AICTE ఇంటర్న్షిప్ పోర్టల్ ద్వారా దరఖాస్తు సమర్పించాలి. దరఖాస్తుల స్వీకరణకు చివరి తేదీ 2026 ఆగస్టు 2గా నిర్ణయించారు. డిగ్రీ వెరిఫికేషన్ సర్టిఫికెట్, పోలీస్ వెరిఫికేషన్ సర్టిఫికెట్, డ్రైవింగ్ లైసెన్స్, పాస్పోర్ట్ సైజ్ ఫోటో సమర్పించాల్సి ఉంటుంది. ఇది పూర్తిగా నైపుణ్యాలను పెంపొందించే శిక్షణా కార్యక్రమం మాత్రమేనని, దీని ద్వారా సైన్యంలో ఉద్యోగం (Job Guarantee) వస్తుందనే ప్రచారంలో నిజం లేదని భారత సైన్యం స్పష్టం చేసింది.
🔥 గత 24 గంటల్లో అత్యధికంగా చదివిన వార్తలు
ఇవి గత 24 గంటల్లో ఎక్కువ మంది చదివిన వార్తలు
