హైదరాబాద్, సూర్య న్యూస్ : తెలంగాణ అసెంబ్లీ సమావేశాలు ప్రారంభం కానున్న నేపథ్యంలో బీఆర్ఎస్ (BRS) అధినేత, మాజీ ముఖ్యమంత్రి కేసీఆర్ (KCR) పార్టీ శాసనసభా పక్షం సమావేశాన్ని నిర్వహించారు. శనివారం ఎర్రవల్లిలోని తన నివాసంలో జరిగిన ఈ భేటీలో పార్టీకి చెందిన ఎమ్మెల్యేలు, ఎమ్మెల్సీలు, ముఖ్య నేతలు పాల్గొన్నారు. రానున్న అసెంబ్లీ సమావేశాల్లో అనుసరించాల్సిన వ్యూహాలపై నేతలకు కేసీఆర్ దిశానిర్దేశం చేశారు. కాంగ్రెస్ ప్రభుత్వ వైఫల్యాలను, ప్రజా సమస్యలను సభలో ఎండగట్టాలని, ప్రతిపక్షంగా పార్టీ బలాన్ని సమర్థవంతంగా వినియోగించుకోవాలని సూచించారు.
సంఖ్యాబలమే కీలకం.. పక్కా ఆధారాలతో ప్రశ్నించాలి
అసెంబ్లీ సమావేశాలకు బీఆర్ఎస్ ఎమ్మెల్యేలంతా తప్పనిసరిగా హాజరుకావాలని కేసీఆర్ స్పష్టం చేశారు. ప్రతిపక్షంగా ఉన్న సమయంలో సంఖ్యాబలం అత్యంత కీలకమని ఆయన నేతలకు సూచించారు. కేవలం రాజకీయ విమర్శలకు మాత్రమే పరిమితం కాకుండా, ప్రభుత్వ నిర్ణయాలు, నియోజకవర్గాల సమస్యలపై పూర్తి సమాచారంతో సభకు రావాలని దిశానిర్దేశం చేశారు. కాంగ్రెస్ పాలనపై ప్రజల్లో తీవ్ర అసంతృప్తి ఉందని, ఎన్నికల సమయంలో ఇచ్చిన హామీల అమలుపై ప్రభుత్వాన్ని నిలదీయాలని అన్నారు. సభలో మాట్లాడే విషయాల్లో ఎమ్మెల్యేలు సమన్వయంతో వ్యవహరించాలని, ఒక్కో అంశాన్ని ఆధారాలతో సహా సభ ముందు ఉంచాలని పేర్కొన్నారు. శాసనసభ నిర్వహణలో స్పీకర్ పక్షపాత వైఖరి ప్రదర్శిస్తే, ఆ విషయాన్ని సభలోనే ఎండగట్టాలని, నిబంధనల ప్రకారం దక్కాల్సిన అవకాశాలను వినియోగించుకోవాలని సూచించారు. సభలో తమకు అన్యాయం జరిగితే నిబంధనల ప్రకారం నిరసన వ్యక్తం చేయాలని తెలిపారు.
నా చావు కోరుతూనే సభకు రమ్మంటున్నారు
ఇదే సమావేశంలో కాంగ్రెస్ ప్రభుత్వ పాలనపై, ముఖ్యమంత్రి రేవంత్ రెడ్డి వ్యవహారశైలిపై కేసీఆర్ తీవ్ర అభ్యంతరం వ్యక్తం చేశారు. ఒకవైపు అసెంబ్లీలో చర్చకు రావాలని అధికార పక్షం ప్రతిపక్ష నేతలను ఆహ్వానిస్తూనే, మరోవైపు వ్యక్తిగత దూషణలు, అసభ్యకర వ్యాఖ్యలు చేస్తున్నారని ఆయన మండిపడ్డారు. రాజకీయ చర్చలు విధానాలు, ప్రజా సమస్యలపై ఉండాలని ఆయన అభిప్రాయపడ్డారు. “నా చావు కోరుతూ కొందరు కాంగ్రెస్ నాయకులు మాట్లాడుతున్నారు, అదే సమయంలో తాను అసెంబ్లీకి రావాలని డిమాండ్ చేయడం వారి ద్వంద్వ వైఖరికి నిదర్శనం” అని కేసీఆర్ విమర్శించారు. తెలంగాణలో ప్రస్తుతం ‘థర్డ్ క్లాస్ పాలన’ సాగుతోందని, ప్రభుత్వం చెబుతున్నట్లు ‘తెలంగాణ రైజింగ్’ కాదని, ‘తెలంగాణ ఫాలింగ్’ కనిపిస్తోందని ఆయన ఎద్దేవా చేశారు. అభివృద్ధి, ప్రజా సంక్షేమం విషయంలో ఆశించిన స్థాయిలో ఫలితాలు కనిపించడం లేదని ఆరోపించారు.
లక్ష మందితో ప్రాజెక్టుల వద్దకు పోరాటం
సాగునీటి ప్రాజెక్టుల అంశాన్ని ప్రధాన అస్త్రంగా మలచుకోవాలని బీఆర్ఎస్ నిర్ణయించింది. కాళేశ్వరం, పాలమూరు-రంగారెడ్డి ఎత్తిపోతల పథకాల విషయంలో కాంగ్రెస్ ప్రభుత్వం అనుసరిస్తున్న వైఖరిని ప్రజల్లోకి తీసుకెళ్లాలని కేసీఆర్ భావిస్తున్నారు. త్వరలోనే ఏకంగా లక్ష మంది ప్రజలతో కలిసి ఈ ప్రాజెక్టులను సందర్శిస్తామని ఆయన ప్రకటించారు. ప్రాజెక్టుల పరిస్థితిని ప్రత్యక్షంగా ప్రజలకు చూపించి, సాగునీటి రంగానికి జరుగుతున్న నష్టాన్ని వివరిస్తామని తెలిపారు. కేవలం అసెంబ్లీ చర్చలకే పరిమితం కాకుండా, ప్రాజెక్టుల అంశంపై ప్రజల్లోకి వెళ్లాలని పార్టీ శ్రేణులకు కేసీఆర్ స్పష్టమైన సందేశం ఇచ్చారు. అటు అసెంబ్లీ వ్యూహం, ఇటు ప్రభుత్వంపై రాజకీయ పోరాటానికి సంబంధించి బీఆర్ఎస్ అధినేత స్పష్టమైన దిశానిర్దేశం చేయడంతో రానున్న అసెంబ్లీ సమావేశాల్లో వేడి మరింత పెరిగే అవకాశం కనిపిస్తోంది.
🔥 గత 24 గంటల్లో అత్యధికంగా చదివిన వార్తలు
ఇవి గత 24 గంటల్లో ఎక్కువ మంది చదివిన వార్తలు
