AP Deputy CM Pawan Kalyan : పవన్ కళ్యాణ్‌కు తీవ్ర అస్వస్థత.. హుటాహుటిన అత్యవసర ఆపరేషన్ చేసిన వైద్యులు

అమరావతి, సూర్య న్యూస్ : ఆంధ్రప్రదేశ్ (Andhra Pradesh) ఉప ముఖ్యమంత్రి (Deputy CM), జనసేనాని పవన్ కళ్యాణ్ అస్వస్థతకు గురి కావడంతో శనివారం సాయంత్రం ఒక ప్రైవేట్ ఆసుపత్రిలో అత్యవసర సర్జరీ (Emergency Surgery) నిర్వహించారు. కొంతకాలంగా ఆయన శారీరక శ్రమ మరియు పని ఒత్తిడితో సతమతమవుతున్నారు. శుక్రవారం అధికారులతో పాలనాపరమైన సమీక్ష (Review Meeting) నిర్వహిస్తుండగా ఆయన అకస్మాత్తుగా తీవ్ర అస్వస్థతకు గురయ్యారు. వెంటనే అప్రమత్తమైన సిబ్బంది ఆయనకు ప్రాథమిక వైద్య పరీక్షలు నిర్వహించారు. వైద్యుల సూచన మేరకు ఆయన అన్ని అధికారిక కార్యక్రమాలను రద్దు చేసుకుని చికిత్స కోసం ఆసుపత్రికి వెళ్లారు.

ఆసుపత్రిలో వైద్య పరీక్షల్లో భాగంగా డాక్టర్ల బృందం ఎంఆర్ఐ స్కాన్ (MRI Scan) నిర్వహించింది. రిపోర్టులను విశ్లేషించిన వైద్యులు ఏమాత్రం జాప్యం చేయకుండా ఆపరేషన్ చేయాలని నిర్ణయించారు. దాదాపు గంటన్నర పాటు సాగిన ఈ శస్త్రచికిత్స విజయవంతంగా ముగిసింది. ప్రస్తుతం ఆయన ఆరోగ్యం నిలకడగా ఉందని వైద్యులు వెల్లడించారు. పవన్ కళ్యాణ్‌కు (Pawan Kalyan) ఎదురైన అసలు ఆరోగ్య సమస్య ఏమిటన్నది మాత్రం ఆయన వ్యక్తిగత బృందం లేదా ఆసుపత్రి వర్గాలు అధికారికంగా ప్రకటించలేదు.

శస్త్రచికిత్స అనంతరం ఆయన కోలుకోవడానికి కనీసం పది రోజుల పాటు పూర్తి విశ్రాంతి (Complete Rest) అవసరమని వైద్యులు స్పష్టం చేశారు. ఈ పది రోజులు ఎటువంటి రాజకీయ లేదా అధికారిక పర్యటనలు (Official Tours) చేయకూడదని సూచించారు. ఆయన ఇంట్లోనే ఉండి వైద్యుల పర్యవేక్షణలో ఉండాలని స్పష్టం చేశారు. పూర్తి స్వస్థత చేకూరడానికి మరికొంత కాలం పడుతుందని వైద్యులు పేర్కొన్నారు. ఆహారం, ఇతర అలవాట్ల విషయంలో దీర్ఘకాలిక జాగ్రత్తలు పాటించాలని సలహా ఇచ్చారు. దీంతో ఆయన చేపట్టాల్సిన జిల్లాల పర్యటనలు మరియు ఇతర అధికారిక కార్యక్రమాలు తాత్కాలికంగా వాయిదాపడ్డాయి.