హైదరాబాద్, సూర్య న్యూస్: గ్లోబల్ స్టార్ (Global Star) రామ్ చరణ్ తన వృత్తి పట్ల ఉన్న అంకితభావాన్ని మరోసారి చాటుకున్నారు. బుచ్చిబాబు సానా (Buchi Babu Sana) దర్శకత్వంలో అత్యంత ప్రతిష్టాత్మకంగా తెరకెక్కుతున్న స్పోర్ట్స్ డ్రామా ‘పెద్ది’ (Peddi) షూటింగ్లో ఒక అపశృతి చోటు చేసుకుంది. ఈ చిత్రానికి సంబంధించిన కీలకమైన యాక్షన్ సన్నివేశాల చిత్రీకరణ సమయంలో రామ్ చరణ్ ఎడమ కంటి పైభాగంలో తీవ్రమైన గాయమైంది. గాయం తీవ్రత దృష్ట్యా వైద్యులు ఆయనకు చిన్నపాటి సర్జరీ నిర్వహించి కంటిపై నాలుగు కుట్లు వేశారు. ఈ వార్త తెలియడంతో మెగా అభిమానులు ఒక్కసారిగా ఆందోళనకు గురయ్యారు. అయితే కంటికి ఎలాంటి ప్రమాదం లేదని వైద్యులు స్పష్టం చేయడంతో అందరూ ఊపిరి పీల్చుకున్నారు.
సాధారణంగా ఇలాంటి గాయాలైనప్పుడు నటీనటులు కొన్ని వారాల పాటు విశ్రాంతి తీసుకుంటారు. కానీ రామ్ చరణ్ మాత్రం తన అంకితభావంతో అందరినీ ఆశ్చర్యపరిచారు. మార్చి 27న తన 41వ పుట్టినరోజు (Birthday) జరుపుకుంటున్న వేళ.. విశ్రాంతి తీసుకోకుండా నేరుగా షూటింగ్ సెట్స్లోకి అడుగుపెట్టారు. ప్రస్తుతం అయ్యప్ప మాల దీక్షలో (Ayyappa Deeksha) ఉన్న చరణ్.. కంటిపై బ్యాండేజ్తోనే షూటింగ్లో పాల్గొనడం విశేషం. తన పుట్టినరోజు సందర్భంగా సెట్స్ వద్దకు భారీగా తరలివచ్చిన అభిమానులను ఆయన స్వయంగా పలకరించారు. వారి కోసం ప్రత్యేకంగా టెంట్లు ఏర్పాటు చేయించి తన ఉదారతను చాటుకున్నారు. గాయంతో ఉన్నప్పటికీ అభిమానులతో సెల్ఫీ వీడియోలు దిగుతూ ఉత్సాహంగా కనిపించిన చరణ్ వీడియోలు ప్రస్తుతం సోషల్ మీడియాలో వైరల్ అవుతున్నాయి.
