Hyderabad, Surya News: కేంద్ర హోంశాఖ సహాయ మంత్రి (MoS Home Affairs) బండి సంజయ్ కుమార్ కుమారుడు భగీరథ్ సాయి (Bhagirath Sai) లైంగిక వేధింపుల కేసులో అనూహ్య పరిణామం చోటు చేసుకుంది. మైనర్ బాలికపై వేధింపుల ఆరోపణలతో పోక్సో (POCSO) కేసు ఎదుర్కొంటున్న భగీరథ్ తెలంగాణ హైకోర్టును (Telangana High Court) ఆశ్రయించారు. తాజాగా ఆయన ముందస్తు బెయిల్ మంజూరు చేయాలని పిటిషన్ దాఖలు చేశారు. ప్రస్తుతం అజ్ఞాతంలో ఉన్న భగీరథ్ ఈ పిటిషన్ వేయడం ప్రాధాన్యత సంతరించుకుంది.
ఈ పిటిషన్ను హైకోర్టు విచారణకు స్వీకరించింది. ఈ నెల 14వ తేదీన న్యాయస్థానం విచారణ చేపట్టనుంది. హైకోర్టు వెకేషన్ బెంచ్ (Vacation Bench) ముందు ఈ ముందస్తు బెయిల్ పిటిషన్ విచారణకు రానుంది. ఇందులో బాధితురాలి కుటుంబం కూడా ఇంప్లీడ్ అయ్యే అవకాశం ఉన్నట్లు తెలుస్తోంది. ఈ నేపథ్యంలో పోలీసుల (Telangana Police) తరఫున ప్రభుత్వ న్యాయవాది తమ వాదనలను వినిపించనున్నారు.
మరోవైపు ఈ కేసు దర్యాప్తు అధికారిగా (Investigation Officer) కూకట్పల్లి డీసీపీ రితిరాజ్ నియమితులయ్యారు. సైబరాబాద్ పోలీస్ కమిషనరేట్ (Cyberabad Police) పరిధిలోని పేట్ బషీరాబాద్ పోలీస్ స్టేషన్లో భగీరథ్పై ఈ కేసు నమోదైంది. ఈ కేసును డీసీపీ రితిరాజ్ స్వయంగా దర్యాప్తు చేయనున్నారు. ఈ వ్యవహారంపై మాజీ ఐపీఎస్ అధికారి, బీఆర్ఎస్ (BRS Party) నాయకుడు ఆర్ఎస్ ప్రవీణ్ కుమార్ తీవ్ర స్థాయిలో స్పందించారు. భగీరథ్పై లుకౌట్ నోటీసు (Lookout Notice) జారీ చేయాలని ఆయన డిమాండ్ చేశారు. బాధితురాలి కుటుంబంతో రాజీ కుదిర్చేందుకు ప్రయత్నించిన బండి సంజయ్, బీజేపీ కార్యకర్త సంగప్పలను కూడా ఈ కేసులో చేర్చాలని ఆయన కోరారు.
బీజేపీ (BJP) అధిష్ఠానం మాత్రం ఈ కేసు వ్యవహారంతో పార్టీకి ఎలాంటి సంబంధం లేదని స్పష్టం చేసినట్లు సమాచారం. ఇది పూర్తిగా కుటుంబ వ్యవహారంగా వారు పేర్కొంటున్నారు. చట్టం తన పని తాను చేసుకుపోతుందని బీజేపీ రాష్ట్ర నాయకత్వం స్పష్టం చేసింది. ప్రమేయం ఉంటే పోలీసులు విచారిస్తారని బీజేపీ నేతలు తెలిపారు.