హైదరాబాద్, సూర్య న్యూస్: జగద్గిరిగుట్టలోని శ్రీ మహా ఆది జాంబవ దేవాలయానికి చెందిన భూమి వివాదంలో ఉన్నందున, దానిని ఎవరూ కొనుగోలు లేదా విక్రయాలు చేయవద్దని ఆలయ కమిటీ అధ్యక్షుడు ఎర్ర యాకన్న (Yerra Yakanna) ప్రజలను హెచ్చరించారు. సర్వే నంబర్ 348లో దేవాలయానికి కేటాయించిన స్థలాన్ని కొందరు అక్రమంగా ఆక్రమించుకునేందుకు ప్రయత్నిస్తున్నారని ఆయన ఆరోపించారు.
ఆలయానికి సంబంధించిన ఈ భూమిని ఎర్ర సైదులు, బందెల ప్రసాద్, తిరుపతయ్య అనే వ్యక్తులు అక్రమంగా పాల్వాయి గోపికి విక్రయించినట్లు కమిటీ దృష్టికి వచ్చిందని యాకన్న తెలిపారు. ఈ అక్రమ లావాదేవీలపై కుత్బుల్లాపూర్ రెవెన్యూ అధికారులు, మల్కాజిగిరి ఆర్డీఓ, జిల్లా కలెక్టర్‌కు సైతం ఫిర్యాదు చేశామన్నారు. రెవెన్యూ అధికారుల ఫిర్యాదు మేరకు ఈ భూకబ్జా వ్యవహారంలో ఎర్ర సైదులు, బందెల ప్రసాద్, తిరుపతయ్య, పాల్వాయి గోపి, నరాల వీరస్వామిలపై జగద్గిరిగుట్ట పోలీస్ స్టేషన్‌లో కేసు కూడా నమోదైందని ఆయన వెల్లడించారు.
ఇటీవల రింగ్ బస్తీకి చెందిన కొందరు వ్యక్తులు ఈ వివాదాస్పద స్థలాన్ని కొనుగోలు చేసేందుకు మళ్లీ ప్రయత్నిస్తున్నట్లు తమకు సమాచారం అందిందని, ఈ విషయాన్ని హైడ్రా (HYDRAA) అధికారుల దృష్టికి కూడా తీసుకెళ్లామని ఎర్ర యాకన్న వివరించారు. కాబట్టి ప్రజలు భూమి హక్కులు, యాజమాన్య వివరాలు సరిగా చూసుకోకుండా ఎలాంటి కొనుగోలు, విక్రయ లావాదేవీలు చేయవద్దని సూచించారు. దేవుని మాన్యాన్ని కాపాడేందుకు ప్రతి ఒక్కరూ సహకరించాలని ఆయన కోరారు.
ఈ వార్తపై మీ స్పందన?
🔥 గత 24 గంటల్లో అత్యధికంగా చదివిన వార్తలు
ఇవి గత 24 గంటల్లో ఎక్కువ మంది చదివిన వార్తలు
