పెద్దపల్లి, సూర్య న్యూస్ : విద్యార్థుల ఉజ్వల భవిష్యత్తు కోసం ప్రభుత్వం, తమ వంతుగా పూర్తి సహకారం అందిస్తామని పెద్దపల్లి పార్లమెంట్ సభ్యులు గడ్డం వంశీకృష్ణ (MP Vamshi Krishna) స్పష్టం చేశారు. ఎలిగేడు మండలంలోని సుల్తాన్‌పూర్ (Sultanpur) ప్రభుత్వ పాఠశాలను ఆయన మంగళవారం సందర్శించి, విశాఖ చారిటబుల్ ట్రస్ట్ ఆధ్వర్యంలో విద్యార్థులకు ఉచితంగా స్కూల్ బ్యాగులను పంపిణీ చేశారు.
పాఠశాల సందర్శనలో భాగంగా ఎంపీ వంశీకృష్ణ విద్యార్థులతో ఆత్మీయంగా ముచ్చటించారు. వారి చదువులు, బడిలో ఉన్న సౌకర్యాలు, ఎదుర్కొంటున్న ఇబ్బందులను అడిగి తెలుసుకున్నారు. పాఠశాలలో ప్రధానంగా తాగునీటి సమస్యతో పాటు ఉపాధ్యాయుల కొరత ఉందని విద్యార్థులు, ఉపాధ్యాయులు ఎంపీ దృష్టికి తీసుకువెళ్లగా, వాటిని వెంటనే పరిష్కరించేందుకు తన వంతు కృషి చేస్తానని ఆయన హామీ ఇచ్చారు. అలాగే, ఇటీవల జిల్లా స్థాయిలో నిర్వహించిన తెలుగు వ్యాసరచన పోటీల్లో ప్రథమ స్థానం సాధించిన విద్యార్థిని సాయి విజ్ఞతను అభినందిస్తూ.. ఆమెకు సైకిల్‌ను బహుమతిగా అందజేస్తానని ప్రకటించారు.
సమస్యల పరిష్కారానికి నిధుల మంజూరు
గతంలో కాకా హయాంలో ఈ పాఠశాలకు ప్రహరీ గోడ నిర్మించడం సంతోషంగా ఉందని, బడికి రాగానే కాకా పేరును గుర్తుచేసుకోవడం ఆనందాన్ని ఇచ్చిందని వంశీకృష్ణ పేర్కొన్నారు. పాఠశాలలో మౌలిక వసతుల మెరుగు కోసం సీసీ రోడ్డు నిర్మాణం, వాటర్ ప్లాంట్ ఏర్పాటు, అదనపు తరగతి గదుల నిర్మాణానికి ఎంపీ ల్యాడ్స్ నిధులు మంజూరు చేస్తానని ఆయన హామీ ఇచ్చారు. విద్య అనేది ప్రతి ఒక్కరి ప్రాథమిక హక్కు అని కాకా ఎప్పుడూ చెప్పేవారని ఆయన ఈ సందర్భంగా గుర్తుచేశారు.
ఉపాధ్యాయుల కృషి అభినందనీయం
ఒకప్పుడు కేవలం 11 మంది విద్యార్థులు ఉన్న పాఠశాలలో, ప్రస్తుతం 90 మంది చదువుతున్నారంటే అది కేవలం ఉపాధ్యాయుల కృషి, అంకితభావం వల్లే సాధ్యమైందని ఎంపీ ప్రశంసించారు. విద్యార్థులను ఎలక్ట్రిక్ ఆటోలో బడికి తీసుకురావడం, తిరిగి ఇళ్లకు చేర్చడం చూస్తుంటే పిల్లల పట్ల ఉపాధ్యాయులకు ఉన్న చిత్తశుద్ధి అర్థమవుతోందన్నారు. విద్యార్థులు క్రమశిక్షణ, పట్టుదలతో చదివి తల్లిదండ్రుల ఆశయాలను నెరవేర్చాలని, విద్యాభివృద్ధిలో పెద్దపల్లి జిల్లాను రాష్ట్ర, జాతీయ స్థాయిలో అగ్రగామిగా నిలపాలని పిలుపునిచ్చారు.
యంగ్ ఇండియా ఇంటిగ్రేటెడ్ స్కూళ్లతో కొత్త శకం
ముఖ్యమంత్రి రేవంత్ రెడ్డి నేతృత్వంలోని కాంగ్రెస్ ప్రభుత్వం విద్య, వైద్య రంగాలకు అత్యధిక ప్రాధాన్యత ఇస్తోందని ఎంపీ వంశీకృష్ణ తెలిపారు. రాష్ట్రవ్యాప్తంగా యంగ్ ఇండియా ఇంటిగ్రేటెడ్ స్కూళ్ల నిర్మాణంతో పాటు, విద్యార్థులకు పౌష్టికాహారం అందించేందుకు మధ్యాహ్న భోజన పథకాన్ని పకడ్బందీగా అమలు చేస్తోందని వివరించారు. విద్యార్థుల్లో సృజనాత్మకతను, నూతన ఆవిష్కరణలను ప్రోత్సహించేందుకు ‘కాకా గ్రోత్ ఫండ్’ను అందుబాటులోకి తెచ్చామని, స్టార్టప్ ఐడియాలతో ముందుకు వచ్చే యువత భవిష్యత్తులో ఉన్నత శిఖరాలను అధిరోహించాలని ఆయన ఆకాంక్షించారు.
ఈ వార్తపై మీ స్పందన?
🔥 గత 24 గంటల్లో అత్యధికంగా చదివిన వార్తలు
ఇవి గత 24 గంటల్లో ఎక్కువ మంది చదివిన వార్తలు
