నార్తర్న్ రైల్వే, డీఎస్‌ఎస్‌ఎస్‌బీ, ఏఎస్‌ఆర్‌బీ, జామియా మిలియాలో ఖాళీలు.. దరఖాస్తులకు ఆఖరి తేదీలు డిసెంబర్‌లో
న్యూఢిల్లీ, సూర్య న్యూస్ :
కేంద్ర ప్రభుత్వ (Central Government) ఉద్యోగాల కోసం ఎదురుచూస్తున్న నిరుద్యోగులకు అదిరిపోయే శుభవార్త. రైల్వే, ఏఎస్‌ఆర్‌బీ, డీఎస్‌ఎస్‌ఎస్‌బీ, జామియా మిలియా తదితర కేంద్ర విభాగాల్లో ఏకంగా 7,390 పోస్టుల భర్తీకి వరుస నోటిఫికేషన్లు విడుదలయ్యాయి. టెన్త్, ఐటీఐ నుంచి మొదలుకొని డిప్లొమా, ఇంజినీరింగ్, వ్యవసాయ డిగ్రీలు చేసిన అభ్యర్థులకు ఇది సువర్ణావకాశం. ఆయా పోస్టుల అర్హతలు, ఎంపిక విధానం, దరఖాస్తు వెబ్‌సైట్ల పూర్తి వివరాలు మీకోసం..
నార్తర్న్ రైల్వేలో 4,651 అప్రెంటిస్ పోస్టులు
నార్తర్న్ రైల్వే (RRC NR) పరిధిలోని వివిధ క్లస్టర్లలో 4,651 యాక్ట్ అప్రెంటిస్ ఖాళీల భర్తీకి దరఖాస్తులు కోరుతోంది. 15 నుంచి 24 ఏళ్ల వయసు ఉండి, కనీసం 50 శాతం మార్కులతో టెన్త్, అలాగే సంబంధిత ట్రేడ్‌లో ఐటీఐ పాసైన వారు అర్హులు. వీరికి ఎలాంటి రాత పరీక్ష, ఇంటర్వ్యూ ఉండదు. కేవలం టెన్త్, ఐటీఐ మార్కుల మెరిట్ ఆధారంగా ఎంపిక చేస్తారు. ఆసక్తిగల అభ్యర్థులు డిసెంబర్ 11వ తేదీలోపు www.rrcnr.org వెబ్‌సైట్‌లో దరఖాస్తు చేసుకోవాలి.
ఢిల్లీ ప్రభుత్వంలో 1,260 జేఈ, ఎంటీఎస్ ఉద్యోగాలు
ఢిల్లీ సబార్డినేట్ సర్వీసెస్ సెలెక్షన్ బోర్డ్ (DSSSB) ద్వారా 1,260 జూనియర్ ఇంజనీర్ (JE), మల్టీ-టాస్కింగ్ స్టాఫ్ (MTS) ఖాళీలను భర్తీ చేయనున్నారు. ఇందులో 1,075 ఎంటీఎస్ పోస్టులు ఉండగా, వీటికి కేవలం టెన్త్ పాసైతే సరిపోతుంది. 185 జేఈ (ఎలక్ట్రికల్) పోస్టులకు సంబంధిత విభాగంలో డిగ్రీ లేదా డిప్లొమా చేసి ఉండాలి. అర్హులైన అభ్యర్థులు డిసెంబర్ 11వ తేదీలోపు dsssbonline.nic.in ద్వారా ఆన్‌లైన్‌లో అప్లై చేసుకోవాల్సి ఉంటుంది.
ASRB ద్వారా వ్యవసాయ, సాంకేతిక విభాగాల్లో 1,393 ఖాళీలు
ఇండియన్ కౌన్సిల్ ఆఫ్ అగ్రికల్చరల్ రీసెర్చ్ (ICAR) పరిధిలోని సంస్థలు, కృషి విజ్ఞాన కేంద్రాల్లో 1,393 టెక్నికల్ అసిస్టెంట్ (T-3), సీనియర్ టెక్నికల్ అసిస్టెంట్ (T-4) పోస్టులను అగ్రికల్చరల్ సైంటిస్ట్స్ రిక్రూట్‌మెంట్ బోర్డ్ (ASRB) భర్తీ చేయనుంది. వ్యవసాయం, ఐటీ, లైబ్రరీ సైన్స్, ఇంజినీరింగ్ తదితర విభాగాల్లో డిగ్రీ లేదా డిప్లొమా పూర్తి చేసిన వారు ఈ పోస్టులకు అర్హులు. ఫిబ్రవరి 2027లో జరిగే ప్రిలిమ్స్, ఆపై మెయిన్స్ ఆన్‌లైన్ పరీక్షల (CBT) ద్వారా ఎంపిక చేస్తారు. ఇంటర్వ్యూ ఉండదు. దరఖాస్తులకు డిసెంబర్ 17 ఆఖరి తేదీ కాగా, www.asrb.gov.in వెబ్‌సైట్ ద్వారా అప్లై చేసుకోవచ్చు.
జామియా మిలియా ఇస్లామియాలో 85 నాన్-టీచింగ్ పోస్టులు
ప్రముఖ కేంద్ర విశ్వవిద్యాలయం జామియా మిలియా ఇస్లామియా (JMI)లో యూడీసీ, అసిస్టెంట్, సెక్షన్ ఆఫీసర్, టైపిస్ట్ వంటి 85 నాన్-టీచింగ్ పోస్టుల భర్తీకి నోటిఫికేషన్ విడుదలైంది. పోస్టును బట్టి టెన్త్, ఇంటర్, డిగ్రీ లేదా పీజీ చేసిన వారు jobs.jmi.ac.in వెబ్‌సైట్‌లో డిసెంబర్ 11లోపు దరఖాస్తు చేసుకోవాలి. ఆన్‌లైన్‌లో సమర్పించిన దరఖాస్తును ప్రింట్ తీసి, సర్టిఫికెట్లు జతచేసి డిసెంబర్ 21లోపు యూనివర్సిటీకి హార్డ్ కాపీని తప్పనిసరిగా పంపాల్సి ఉంటుంది.
ఈ వార్తపై మీ స్పందన?
🔥 గత 24 గంటల్లో అత్యధికంగా చదివిన వార్తలు
ఇవి గత 24 గంటల్లో ఎక్కువ మంది చదివిన వార్తలు
