సూర్య న్యూస్ డిజిటల్: టాలీవుడ్ వెండితెరపై ఒకప్పుడు వెలుగు వెలిగిన హిట్ జోడీ శివాజీ మరియు లయ సుమారు రెండు దశాబ్దాల తర్వాత మళ్ళీ జంటగా నటించిన చిత్రం ‘సాంప్రదాయిని సుప్పిని సుద్దపూసని’. దర్శకుడు సుధీర్ శ్రీరామ్ డార్క్ కామెడీ మరియు మర్డర్ మిస్టరీ నేపథ్యంలో తెరకెక్కించిన ఈ సినిమా మార్చి 6న థియేటర్లలో విడుదలైంది. ట్రైలర్ తో ఆసక్తి రేకెత్తించిన ఈ చిత్రం ప్రేక్షకులను ఏ మేరకు మెప్పించిందో ఈ సమీక్షలో చూద్దాం.
సాంకేతిక వర్గంనటీనటులు: శివాజీ, లయ, రోషన్, శరత్ లోహితాశ్వ, ఆలీ, ధన్రాజ్, ప్రిన్స్, జబర్దస్త్ ఇమ్మాన్యుయేల్, రాజ్ తిరందాస్, కరణ్ తదితరులు
దర్శకత్వం: సుధీర్ శ్రీరామ్
నిర్మాత: శివాజీ శొంఠినేని
సంగీతం: రంజిన్ రాజ్
సినిమాటోగ్రఫీ: రిత్విక్ రెడ్డి
ఎడిటింగ్: బాలు మనోజ్
బ్యానర్: శ్రీ శివాజీ ప్రొడక్షన్స్
కథా నేపథ్యం
అన్నమయ్య జిల్లాలోని కొత్తపేట గ్రామంలో శ్రీరామ్ (శివాజీ) ఒక నిజాయితీ గల పంచాయతీ సెక్రటరీగా పనిచేస్తుంటాడు. అతని భార్య ఉత్తర (లయ), కుమారుడు మిట్టు (రోషన్) చేసే వింత పనులు శ్రీరామ్ కు తరచూ తలనొప్పులు తెస్తుంటాయి. అయితే వీరి జీవితంలోకి ఎస్సై విక్రమ్ (ప్రిన్స్) ప్రవేశించిన తర్వాత కథ అనూహ్య మలుపు తిరుగుతుంది. ఒక ప్రమాదంలో ఎస్సై మరణించడంతో, ఆ శవాన్ని మాయం చేయడానికి ఈ సామాన్య కుటుంబం పడే పాట్లు, ఆ క్రమంలో ఎదురయ్యే హాస్య పూరిత సంఘటనల సమాహారమే ఈ సినిమా కథ.
విశ్లేషణ
చాలా కాలం తర్వాత శివాజీ తనదైన సహజ సిద్ధమైన నటనతో ఆకట్టుకున్నారు. మధ్యతరగతి ఇబ్బందులు పడే వ్యక్తిగా, శవాన్ని దాచే క్రమంలో భయపడే పాత్రలో ఆయన చక్కగా ఒదిగిపోయారు. లయ తన సెకండ్ ఇన్నింగ్స్ లో పర్వాలేదనిపించారు. సినిమాకు ప్రధాన బలం ఆలీ, ధన్రాజ్, ఇమ్మాన్యుయేల్ ల కామెడీ ట్రాక్. రంజిన్ రాజ్ అందించిన నేపథ్య సంగీతం సన్నివేశాలను ఎలివేట్ చేసింది.
అయితే కథా పరంగా చూస్తే, ఇది గతంలో వచ్చిన ‘దృశ్యం’ సినిమాను గుర్తుకు తెస్తుంది. ఫస్టాఫ్లో వచ్చే రొటీన్ సీన్లు, రెగ్యులర్ డ్రామా వల్ల కథ కొంచెం సాగదీసినట్టు అనిపిస్తుంది. ఊహించని ట్విస్టులు లేకపోవడం కొంత నిరాశ కలిగించినా, దర్శకుడు సుధీర్ శ్రీరామ్ సెకండాఫ్ను డీల్ చేసిన విధానం సినిమాకు ప్లస్ పాయింట్ అయింది. ముఖ్యంగా ప్రీ క్లైమాక్స్ నుంచి ముగింపు వరకు సన్నివేశాలను బాగా ప్లాన్ చేసి, ఫస్టాఫ్లో కలిగిన అసంతృప్తిని తగ్గించే ప్రయత్నం చేశారు.
ముగింపు: శివాజీ, లయల కాంబినేషన్ మరియు సెకండాఫ్ లోని ఫన్ డ్రామా కోసం ఈ చిత్రాన్ని ఒకసారి చూడవచ్చు.
Suryanews.in Rating: 2.75/5
🔥 గత 24 గంటల్లో అత్యధికంగా చదివిన వార్తలు
ఇవి గత 24 గంటల్లో ఎక్కువ మంది చదివిన వార్తలు
