హైదరాబాద్, సూర్య న్యూస్: ఐపీఎల్ (IPL 2026) వేదికగా రాజస్థాన్ రాయల్స్ (Rajasthan Royals) తరఫున సంచలన ఇన్నింగ్స్లతో దూసుకుపోతున్న 15 ఏళ్ల వండర్ కిడ్ వైభవ్ సూర్యవంశీకి (Vaibhav Suryavanshi) క్రికెట్ దిగ్గజాలు గట్టి హెచ్చరికలు జారీ చేశారు. చిన్న వయసులోనే వస్తున్న అపారమైన కీర్తి, కోట్ల రూపాయల బ్రాండ్ ఎండార్స్మెంట్లు కెరీర్ను దెబ్బతీసే ప్రమాదం ఉందని న్యూజిలాండ్ మాజీ క్రికెటర్ సైమన్ డూల్ (Simon Doull) మరియు ప్రముఖ కామెంటేటర్ హర్షా భోగ్లే (Harsha Bhogle) అప్రమత్తం చేశారు.
క్రిక్బజ్ చర్చా కార్యక్రమంలో సైమన్ డూల్ మాట్లాడుతూ.. వైభవ్ చుట్టూ ఉండే వ్యక్తుల విషయంలో చాలా జాగ్రత్తగా ఉండాలని సూచించారు. “ప్రస్తుతం వైభవ్ ఒక స్టార్. భవిష్యత్తులో సూపర్స్టార్ అయ్యే సత్తా ఉంది. కానీ, ఎన్నో మేనేజ్మెంట్ కంపెనీలు (Management Companies) అతన్ని బుట్టలో వేసుకోవడానికి ప్రయత్నిస్తాయి. ఈ కంపెనీలకు ఆటగాడి భవిష్యత్తు కంటే తమ జేబులు నింపుకోవడమే ముఖ్యం. ఒక్కసారి ప్రదర్శన పడిపోతే, వాళ్లు నిన్ను వదిలేసి మరో కొత్త సంచలనం కోసం వెళ్లిపోతారు. అందుకే ఎవరిని నమ్మాలో తెలుసుకోవాలి” అని డూల్ హెచ్చరించారు.
ఇదే విషయంలో హర్షా భోగ్లే మాట్లాడుతూ.. గాడ్ ఆఫ్ క్రికెట్ సచిన్ టెండూల్కర్ను (Sachin Tendulkar) ఉదాహరణగా చూపారు. సచిన్ అంత చిన్న వయసులో అంతర్జాతీయ క్రికెట్లోకి వచ్చి, శిఖరాలను అధిరోహించినా దారి తప్పకపోవడానికి కారణం అతని కుటుంబం అందించిన బలమైన మద్దతేనని గుర్తు చేశారు. “వైభవ్ దారి తప్పకుండా ఉండాలంటే అతనికి సచిన్ లాంటి కుటుంబ మద్దతు అవసరం. చుట్టూ ఉన్న గ్లామర్ చూసి మోసపోకుండా ఉండాలంటే క్రమశిక్షణ చాలా ముఖ్యం” అని భోగ్లే వివరించారు. కేవలం 15 ఏళ్లకే భారీ ఒప్పందాలు కుదుర్చుకుంటున్న వైభవ్, మైదానం బయట ఎదురయ్యే సవాళ్లను తట్టుకుని నిలబడితేనే భారత క్రికెట్లో సుదీర్ఘ కాలం కొనసాగుతారని విశ్లేషకులు భావిస్తున్నారు.
ఈ వార్తపై మీ స్పందన?
🔥 గత 24 గంటల్లో అత్యధికంగా చదివిన వార్తలు
ఇవి గత 24 గంటల్లో ఎక్కువ మంది చదివిన వార్తలు
